அனைவராலும் பேசப்பட்ட சுனாமி பேபி 81

Colombo (News 1st) சுனாமி பேரலை ஏற்பட்ட சந்தர்ப்பத்தில் உள்நாட்டினதும் சர்வதேசத்தினதும் கவனத்தை ஈர்த்த சுனாமி பேபி 81. சுனாமி பேரிடரால் கல்முனை வைத்தியசாலை முழுவதுமாக அல்லோலகல்லப்பட்டிருந்தது. கல்முனை வைத்தியசாலையின் தொட்டிலில் தவழ்ந்த அந்தக் குழந்தைக்கு உரிமை கோரி 9 தாய்மார் குரலெழுப்பினர். 9 பெற்றோரினது மரபணு பரிசோதனைகளை வழங்குமாறு நீதிமன்றம் பணித்தது. அன்றிலிருந்து 52 ஆவது நாளில் சுனாமி பேபி 81, ஜெயராஜ் - ஜூனிலதா தம்பதியினரின் குழந்தை அபிலாஷ் என உறுதி செய்யப்பட்டு அவர்களிடம் ஒப்படைக்கப்பட்டது. 2004 ஆம் ஆண்டு குழந்தையாக இருந்த சுனாமி பேபி 81 என்றழைக்கப்பட்ட அபிலாஷ், 17 ஆண்டுகளின் பின்னர் இன்று மட்டக்களப்பு - குருக்கள்மடத்தில் உள்ள தனது இல்லத்தில் வசித்து வருவதுடன் மட்டக்களப்பு - செட்டிபாளையம் மகா வித்தியாலயத்தில் தற்போது உயர்தரத்தின் கலைப்பிரிவில் கல்விகற்று வருகின்றார். அவருடைய இல்லத்தில் அமைக்கப்பட்டுள்ள சுனாமி நினைவுத்தூபிக்கு முன்பாக இன்று (26) அவர் அஞ்சலி செலுத்தியதுடன் ஆழிப்பேரலையில் உயிரிழந்த உறவுகளுக்காக பிரார்த்தனையிலும் ஈடுபட்டார்.