யாழ். மாநகர சபையின் வரவு செலவுத் திட்டம் நிறைவேற்றம்

Colombo (News 1st) யாழ். மாநகர சபையின் 2022 ஆம் ஆண்டுக்கான வரவு செலவுத் திட்டம் 3 மேலதிக வாக்குகளால் நிறைவேற்றப்பட்டுள்ளது. தமிழ் தேசிய மக்கள் முன்னியின் வசமுள்ள யாழ். மாநகர சபையின் 2022 ஆண்டுக்கான வரவு செலவுத்திட்டம் இன்று (15) மாநகர முதல்வர் சட்டத்தரணி விஸ்வலிங்கம் மணிவண்ணனால் சபையில் சமர்ப்பிக்கப்பட்டது. தமிழ் தேசிய மக்கள் முன்னணியின் 10 உறுப்பினர்களும் ஈழ மக்கள் ஜனநாயக கட்சியின் 10 உறுப்பினர்களும் ஸ்ரீலங்கா சுதந்திர கட்சியின் 2 உறுப்பினர்களும் ஐக்கிய தேசியக் கட்சி மற்றும் தமிழர் விடுதலைக் கூட்டணியின் தலா ஒரு உறுப்பினர் என 24 உறுப்பினர்கள் ஆதரவாக வாக்களித்துள்ள அதேவேளை, தமிழ் தேசியக் கூட்டமைப்பின் 16 உறுப்பினர்களும் தமிழ் தேசிய மக்கள் முன்னணியின் 3 உறுப்பினர்களும் ஐக்கிய தேசியக் கட்சியின் 2 உறுப்பினர்கள் என 21 உறுப்பினர்கள் எதிராக வாக்களித்துள்ளனர். இதனால் யாழ். மாநகர சபையின் 2022 ஆம் ஆண்டுக்கான வரவு செலவுத் திட்டம் 3 மேலதிக வாக்கினால் நிறைவேற்றப்பட்டுள்ளது. 45 உறுப்பினர்கள் அங்கம் வகிக்கும் யாழ். மாநகர சபையில் தமிழ் தேசியக் கூட்டமைப்பின் சார்பில் 16 உறுப்பினர்களும் தமிழ் தேசிய மக்கள் முன்னணியின் சார்பில் 13 உறுப்பினர்களும் ஈழ மக்கள் ஜனனாயக கட்சியின் சார்பில் 10 உறுப்பினர்களும் ஐக்கிய தேசியக் கட்சி சார்பில் 3 உறுப்பினர்களும் ஸ்ரீலங்கா சுதந்தி கட்சி சார்பில் 2 உறுப்பினர்களும் மற்றும் தமிழர் விடுதலைக் கூட்டணி சார்பில் ஒரு உறுப்பினரும் அங்கம் வகிக்கின்றமை குறிப்பிடத்தக்கது.