வெட்டப்பட்ட கைகளை மீண்டும் பொருத்தி யாழ். போதனா வைத்தியசாலை வைத்தியர்கள் சாதனை

Colombo (News 1st) இரண்டு கைகளும் வெட்டப்பட்ட நிலையில் வைத்தியசாலையில் அனுமதிக்கப்பட்ட ஒருவருக்கு பிளாஸ்டிக் சத்திரசிகிச்சை மேற்கொண்டு மீண்டும் கைகளைப் பொருத்தி யாழ். போதனா வைத்தியசாலை வைத்தியர்கள் சாதனை படைத்துள்ளனர். கிளிநொச்சி - விசுவமடுவை சேர்ந்த மதுரை வீரன் காந்தராஜ் எனும் 40 வயதானவர் கடந்த மாதம் 22 ஆம் திகதி இரண்டு கைகளும் வெட்டப்பட்ட நிலையில், மேலதிக சிகிச்சைகளுக்காக கிளிநொச்சியிலிருந்து யாழ். போதனா வைத்தியசாலைக்கு மாற்றப்பட்டுள்ளார். வைத்திய நிபுணர் டொக்டர் இளஞ்செழியன் பல்லவன் 9 மணித்தியாலங்களாக பிளாஸ்டிக் சத்திரசிகிச்சையில் ஈடுபட்டு இந்த சாதனையைப் படைத்துள்ளார். நரம்புகள், இரத்த நாளங்கள் அனைத்தும் சீராகப் பொருந்திய நிலையில், ம.காந்தராஜ் வைத்தியசாலையிலிருந்து வெளியேறியுள்ளார். அவர் இயல்பு வாழ்க்கைக்கு திரும்ப 2 மாதங்கள் வரை செல்லலாம் என யாழ். போதனா வைத்தியசாலையின் பணிப்பாளர் டொக்டர் சத்தியமூர்த்தி தெரிவித்தார்.