தமிழகத்திலிருந்து சட்டவிரோதமாக இலங்கை வர முயன்ற இரு இளைஞர்களிடம் Q பிரிவு பொலிஸார் விசாரணை

Colombo (News 1st) தமிழகத்தின் இராமேஸ்வரத்திலிருந்து இலங்கைக்கு சட்டவிரோதமாகப் பயணிக்க முயன்ற இரு இளைஞர்களிடம் கடந்த இரு நாட்களாக விசாரணைகள் மேற்கொள்ளப்பட்டு வருகின்றன. தமிழகத்தின் இராமேஸ்வரத்திலுள்ள தனியார் விடுதியில் இலங்கையை சேர்ந்த ஐவர் தங்கியுள்ளதாக கிடைத்த இரகசிய தகவலின் அடிப்படையில் Q பிரிவு பொலிஸார் அங்கு சென்றதாக அங்குள்ள நியூஸ்ஃபெஸ்ட் செய்தியாளர் தெரிவித்தார். இதற்கமைய, அந்த ஐவரும் இராமநாதபுரம் Q பிரிவு அலுவலகத்திற்கு அழைத்துச் செல்லப்பட்டு விசாரணைகளுக்கு உட்படுத்தப்பட்டுள்ளனர். இவர்கள் வவுனியா - இலுப்பைக்குளம், மன்னார் - அடம்பன் பகுதிகளைச் சேர்ந்தவர்கள் என்பதுடன், மேலும் மூவர் கும்மிடிப்பூண்டியைச் சேர்ந்தவர்கள் என்பது விசாரணைகளில் தெரியவந்துள்ளது. திருவள்ளூர் - கும்மிடிப்பூண்டி அகதி முகாமில் தங்கிருந்த இவர்கள் சட்டவிரோதமாக இலங்கைக்கு வருவதற்கு திட்டமிட்டிருந்தனர். கும்மிடிப்பூண்டி முகாமில் அகதியாக இருந்த மூவரும் விசாரணைகளின் பின்னர் மீண்டும் முகாமிற்கு அனுப்பி வைக்கப்பட்டுள்ளனர்.