பெட்ரோலிய வளத்துறை அமைச்சு வளாகத்தில் துப்பாக்கி பிரயோகம்: கைதான பொலிஸ் சார்ஜன்ட் விடுவிப்பு

Colombo (News 1st) பெட்ரோலிய வளத்துறை அமைச்சின் வளாகத்தில் இடம்பெற்ற துப்பாக்கி பிரயோகம் தொடர்பில் கைதான அமைச்சரின் பாதுகாப்பு பிரிவு பொலிஸ் சார்ஜன்டை குற்றச்சாட்டுகளிலிருந்து விடுவிக்க கொழும்பு பிரதம நீதவான் உத்தரவிட்டுள்ளார். கொழும்பு பிரதம நீதவான் லங்கா ஜயரத்ன முன்னிலையில் இன்று சம்பவம் தொடர்பான வழக்கு விசாரணைக்கு எடுத்துக்கொள்ளப்பட்ட போதே பிரதம நீதவான் இந்த உத்தரவை பிறப்பித்துள்ளார். சந்தேகநபருக்கு எதிராக தொடர்ந்து சட்ட நடவடிக்கைகள் எடுக்கப்படாது என சட்ட மா அதிபரால் பரிந்துரைக்கப்பட்டதற்கு அமைய இந்த உத்தரவு பிறப்பிக்கப்பட்டுள்ளது. சம்பவம் தொடர்பில் விசாரணைகளை மேற்கொள்ளும் குற்றப்புலனாய்வுத் திணைக்களத்தினர் இன்று இது தொடர்பில் அறிக்கை சமர்ப்பித்துள்ளனர். 2018 ஆம் ஆண்டு ஒக்டோபர் மாதம் 27 ஆம் திகதி தெமட்டகொட பகுதியிலுள்ள பெட்ரோலிய கூட்டுத்தாபன தலைமையகத்திற்குள் ஏற்பட்ட அமைதியின்மையை அடுத்து துப்பாக்கி பிரயோகம் நடத்தப்பட்டதுடன், அதில் ஒருவர் உயிரிழந்தமை குறிப்பிடத்தக்கது.