முப்படையினர் விவசாயம் செய்யும் பொதுமக்களின் காணிகளை மீள கையளிப்பது தொடர்பில் ஆராய குழு நியமனம்

முப்படையினர் விவசாயம் செய்யும் பொதுமக்களின் காணிகளை மீள கையளிப்பது தொடர்பில் ஆராய குழு நியமனம்

முப்படையினர் விவசாயம் செய்யும் பொதுமக்களின் காணிகளை மீள கையளிப்பது தொடர்பில் ஆராய குழு நியமனம்

எழுத்தாளர் Staff Writer

18 Oct, 2018 | 7:59 pm

Colombo (News 1st) வடக்கு, கிழக்கு மாகாணங்களில் முப்படையினரால் விவசாய செய்கை மேற்கொள்ளப்படும் பொதுமக்களின் காணிகளை மீள கையளிப்பது தொடர்பில் ஆராய குழு நியமிக்கப்பட்டுள்ளது.

வடக்கு மற்றும் கிழக்கு மாகாணங்களில் இராணுவத்தினரால் 4 பிரதான விவசாயப் பண்ணைகள் முன்னெடுக்கப்படுவதாக இராணுவ ஊடகப் பேச்சாளர், பிரிகேடியர் சுமித் அத்தபத்து தெரிவித்துள்ளார்.

இந்த விவசாயக் காணிகளின் உரிமையாளர்கள் தற்போது உள்ளார்களா என்பது குறித்து ஆராய்ந்து அறிக்கை சமர்ப்பிக்கவே இந்த குழு நியமிக்கப்பட்டுள்ளதாக அவர் கூறினார்.

பாதுகாப்புப் படையினர் வசமுள்ள பொதுமக்களின் காணிகளை எதிர்வரும் டிசம்பர் 31 ஆம் திகதிக்கு முன்னர் காணி உரிமையாளர்களிடம் வழங்க வேண்டும் என கடந்த வடக்கு, கிழக்கு அபிவிருத்தி தொடர்பான ஜனாதிபதி செயலணியின் கூட்டத்தின் போது ஜனாதிபதி மைத்திரிபால சிறிசேன அதிகாரிகளுக்கு பணிப்புரை விடுத்தார்.

இந்த பணிப்புரைக்கு அமைய, இராணுவத்தினர் வசமுள்ள சுமார் 500 ஏக்கர் காணிகளை அதன் உரிமையாளர்களிடம் கையளிப்பதற்கான நடவடிக்கைகள் தற்போது முன்னெடுக்கப்பட்டுள்ளதாக இராணுவ ஊடகப் பேச்சாளர் கூறினார்.

தேசிய பாதுகாப்புக்கு அச்சுறுத்தல் ஏற்படாத வகையில் அவற்றை பொதுமக்களுக்கு மீள கையளிப்பதற்கு நடவடிக்கை எடுக்கப்பட்டுள்ளதாக அவர் குறிப்பிட்டார்.

கடந்த 2015 ஆம் ஆண்டு டிசம்பர் மாதம் 30 ஆம் திகதி முதல் இதுவரையான காலப்பகுதிக்குள் வடக்கில் 88,599 ஏக்கர் காணிகளும், கிழக்கில் 61,126 ஏக்கர் காணிகளும் அவற்றின் உரிமையாளர்களிடம் கையளிக்கப்பட்டுள்ளதாக இராணுவ ஊடகப் பேச்சாளர் தெரிவித்தார்.

தற்போது வடக்கில் 11,557 ஏக்கர் காணியிலும், கிழக்கில் 3,225 ஏக்கர் காணியிலுமே இராணுவத்தினர் நிலைகொண்டுள்ளதாகவும் இராணுவ ஊடகப் பேச்சாளர் பிரிகேடியர் சுமித் அத்தபத்து சுட்டிக்காட்டினார்.


எங்கள் வலைத்தளத்தில் அல்லது வீடியோ செனலில் விளம்பரப்படுத்த ஆர்வமாக உள்ளீர்களா?
[email protected] இல் எங்களை தொடர்பு கொள்ளவும்