இலங்கை - பங்களாதேஷ் முதலாவது டெஸ்ட் கிரிக்கெட் போட்டி வெற்றி தோல்வியின்றி முடிவுற்றது

இலங்கை மற்றும் பங்களாதேஷ் அணிகளுக்கு இடையிலான முதலாவது டெஸ்ட் கிரிக்கெட் போட்டி வெற்றி தோல்வியின்றி முடிவுற்றது. சிட்டகொங்கில் நடைபெற்ற இந்தப்போட்டியில் பங்களாதேஷ் முதல் இன்னிங்ஸில் 513 ஓட்டங்களைப் பெற்றது. முதல் இன்னிங்ஸில் துடுப்பெடுத்தாடிய இலங்கை அணி 9 விக்கெட் இழப்பிற்கு 713 ஓட்டங்களை பெற்று ஆட்டத்தை நிறுத்துவதாக அறிவித்தது. இதன் பிரகாரம் 200 ஓட்டங்கள் பின்தங்கிய நிலையில் இன்னிங்ஸ் தோல்வியை தவிர்க்க வேண்டிய கட்டாயத்தில் 3 விக்கெட் இழப்பிற்கு 81 ஓட்டங்களுடன் பங்களாதேஷ் இன்றைய ஐந்தாம் நாள் ஆட்டத்தை ஆரம்பித்தது. 18 ஓட்டங்களுடன் களமிறங்கிய மொமினுல் ஹக் டெஸ்ட் அரங்கில் தனது 5 ஆவது சதத்தை எட்டினார். மொமினுல் ஹக் முதல் இன்னிங்ஸில் 176 ஓட்டங்களைப் பெற்றிருந்தமையும் குறிப்பிடத்தக்கதாகும். தனது 03 ஆவது டெஸ்ட் அரைச்சதத்தை எட்டிய லிட்டன் தாஸ் 94 ஓட்டங்களைப் பெற்று ஆட்டமிழந்தார். பங்களாதேஷ் அணி 5 விக்கெட் இழப்பிற்கு 307 ஓட்டங்களைப் பெற்றிருந்த போது போட்டி வெற்றி தோல்வியின்றிய முடிவை எட்டியது.