இந்தியாவிற்கு எதிரான முதலாவது டெஸ்ட்: தடுமாற்றத்துடன் இலங்கை அணி

இந்தியாவிற்கு எதிரான முதலாவது டெஸ்ட்: தடுமாற்றத்துடன் இலங்கை அணி

இந்தியாவிற்கு எதிரான முதலாவது டெஸ்ட்: தடுமாற்றத்துடன் இலங்கை அணி

எழுத்தாளர் Bella Dalima

27 Jul, 2017 | 7:44 pm

இந்தியாவிற்கு எதிரான முதலாவது டெஸ்ட் கிரிக்கெட் போட்டியில் இலங்கை அணி தடுமாற்றத்தை எதிர்கொண்டுள்ளது.

முதல் இன்னிங்ஸிற்காக துடுப்பெடுத்தாடும் இலங்கை அணி, இன்றைய இரண்டாம் நாள் ஆட்ட நேர முடிவில் 05 விக்கெட்டுக்களை இழந்து 154 ஓட்டங்களைப் பெற்றிருந்தது.

காலியில் நடைபெறும் இந்தப் போட்டியில் இரண்டாம் நாளான இன்று 3 விக்கெட் இழப்பிற்கு 399 ஓட்டங்களுடன் இந்தியா முதல் இன்னிங்ஸைத் தொடர்ந்தது.

செட்டேஷ்வர் புஜாரா 144 ஓட்டங்களுடனும் அஜின்கியா ரஹானே 39 ஓட்டங்களுடனும் ஆட்டத்தை ஆரம்பித்தனர்.

அஜின்கியா ரஹானே டெஸ்ட் அரங்கில் 12 ஆவது அரைச்சதத்தை எட்ட , ரவிச்சந்திரன் அஸ்வின் 47 ஓட்டங்களுடன் ஆட்டமிழந்தார்.

மத்திய வரிசையில் துடுப்பெடுத்தாடிய ஹர்திக் பாண்டியா அரைச்சதம் கடக்க, இந்திய அணி முதல் இன்னிங்ஸில் சகல விக்கெட்டுக்களையும் இழந்து 600 ஓட்டங்களைப் பெற்றது.

நுவன் பிரதீப் 6 விக்கெட்டுகளை வீழ்த்தினார்.

இதன் மூலம் டெஸ்ட் இன்னிங்ஸ் ஒன்றில் முதற்தடவையாக 05 விக்கெட்டுக்களை வீழ்த்திய வீரர் என்ற சிறப்பை நுவன் பிரதீப் பெற்றார்.

முதல் இன்னிங்ஸைத் தொடர்ந்த இலங்கை அணிக்கு உபுல் தரங்க மற்றும் திமுத் கருணாரத்ன ஜோடி ஆரம்பத்தை வழங்கியது.

இலங்கை அணி 68 ஓட்டங்களுக்கு முதல் மூன்று விக்கெட்டுக்களையும் இழந்தது.

என்றாலும், நம்பிக்கை தரும் விதமாக துடுப்பெடுத்தாடிய உபுல் தரங்க அரைச்சதம் கடந்து அணியை ஸ்திரப்படுத்தினார்.

மத்திய வரிசையில் துடுப்பெடுத்தாடிய அஞ்சலோ மத்யூஸ் 54 ஓட்டங்களுடனும் டில்ருவன் பெரேரா 06 ஓட்டங்களுடனும் ஆட்டமிழக்காமல் உள்ளனர்.


எங்கள் வலைத்தளத்தில் அல்லது வீடியோ செனலில் விளம்பரப்படுத்த ஆர்வமாக உள்ளீர்களா?
[email protected] இல் எங்களை தொடர்பு கொள்ளவும்