ஒரு விநாடி தாமதமாகப் பிறக்கிறது புத்தாண்டு

ஒரு விநாடி தாமதமாகப் பிறக்கிறது புத்தாண்டு

ஒரு விநாடி தாமதமாகப் பிறக்கிறது புத்தாண்டு

எழுத்தாளர் Bella Dalima

30 Dec, 2016 | 5:45 pm

பூமியின் ஒருநாள் சுழற்சியை அடிப்படையாகக் கொண்டு நேரம் கணக்கிடப்படுகிறது. இதனை நாம் வானியல் நேரம் என அழைக்கிறோம்.

இதேபோல உலகம் முழுவதும் 400 இடங்களில் அமைக்கப்பட்டுள்ள அணு கடிகாரம் மூலமும் நேரம் கணக்கிடப்படுகின்றது. இது மிகவும் துல்லியமானது. தற்போது அணு கடிகாரத்தைப் பின்பற்றியே உலகின் நேரம் நிர்ணயிக்கப்படுகிறது.

பொதுவாக பூமி ஒரே வேகத்தில் சுற்றுவது இல்லை. நிலவின் ஈர்ப்பு விசை, நிலநடுக்கம் உள்ளிட்ட பல்வேறு காரணங்களால் சில நேரங்களில் வேகமாகவும் சில நேரங்களில் மெதுவாகவும் சுற்றுகிறது.

இதனால் பூமியின் சுழற்சியை அடிப்படையாகக் கொண்ட வானியல் நேரத்திற்கும் அணு கடிகாரத்தின் நேரத்திற்கும் இடையில் நூலிழை வேறுபாடு இருந்து கொண்டே இருக்கிறது.

அதன்படி, 500 முதல் 750 நாட்கள் கால அளவில் வானியல் நேரத்திற்கும் அணு கடிகார நேரத்திற்கும் இடையே ஒரு விநாடி வேறுபாடு ஏற்படுகிறது.

இதனை ஈடு செய்ய உலகின் அணு கடிகாரங்களில் அவ்வப்போது ஒரு விநாடி கூடுதலாக சேர்க்கப்படுகிறது. இது லீப் விநாடி என்று அழைக்கப்படுகிறது. ஜூன் 30 அல்லது டிசம்பர் 31 ஆம் திகதிகளில் இந்த லீப் விநாடி சேர்க்கப்படும்.

கடந்த 1972 ஆம் ஆண்டில் லீப் விநாடி முதன்முறையாக அறிமுகமானது. அன்று முதல் இன்று வரை 26 முறை லீப் விநாடி சேர்க்கப்பட்டுள்ளது. அந்த வரிசையில் எதிர்வரும் 31 ஆம் திகதி லீப் விநாடி சேர்க்கப்படுகிறது.

எனவே, 2017 புத்தாண்டு பிறக்கக் கூடுதலாக ஒரு விநாடி நேரமாகும் என்று சர்வதேச பூமி சுழற்சி அமைப்பு (IERS) அறிவித்துள்ளது.

லீப் விநாடி குழப்பத்தைத் தவிர்க்க கூகுள் நிறுவனம் சிறப்பு ஏற்பாட்டை செய்துள்ளது.

அதன்படி கூகுளின் சேவர் கடிகாரம் ஒரு விநாடியை ஈடுகட்ட 20 மணி நேரம் சற்று மெதுவாகச் சுற்றும் என்று அந்த நிறுவனம் தெரிவித்துள்ளது.


எங்கள் வலைத்தளத்தில் அல்லது வீடியோ செனலில் விளம்பரப்படுத்த ஆர்வமாக உள்ளீர்களா?
[email protected] இல் எங்களை தொடர்பு கொள்ளவும்