பிரிட்டனின் வெளியுறவு அமைச்சரானார் போரிஸ் ஜோன்சன்

பிரிட்டனின் வெளியுறவு அமைச்சரானார் போரிஸ் ஜோன்சன்

பிரிட்டனின் வெளியுறவு அமைச்சரானார் போரிஸ் ஜோன்சன்

எழுத்தாளர் Staff Writer

14 Jul, 2016 | 11:45 am

பிரிட்டனின் புதிய பிரதமராகப் பதவியேற்றிருக்கும், தெரீசா மே, தனது புதிய அமைச்சரவையை நியமித்திருக்கிறார்.

லண்டனின் முன்னாள் மேயரும், பிரிட்டன் ஐரோப்பிய ஒன்றியத்திலிருந்து வெளியேறவேண்டும் என்று வலியுறுத்திப் பிரசாரம் செய்தவருமான, போரிஸ் ஜோன்சன் புதிய அமைச்சரவையில் பிரிட்டிஷ் வெளியுறவு அமைச்சராக நியமிக்கப்பட்டிருக்கிறார்.

பிரிட்டிஷ் நிதியமைச்சராக இருந்த ஜோர்ஜ் ஓஸ்போர்ன் அமைச்சரவையிலிருந்து நீக்கப்பட்டு, அவருக்கு பதிலாக புதிய நிதியமைச்சராக, ஏற்கனவே வெளியுறவு அமைச்சராக இருந்த பிலிப் ஹேமண்ட் நியமிக்கப்பட்டிருக்கிறார்.

மைக்கேல் போலோன் பாதுகாப்பு அமைச்சராகத் தொடர்ந்தும் அங்கம் வகிக்கின்றார். லியாம் போக்ஸ் சர்வதேச வர்த்தக அமைச்சராக நியமிக்கப்பட்டுள்ளார்.

டேவிட் டேவிஸ், பிரிட்டன் ஐரோப்பிய ஒன்றியத்திலிருந்து வெளியேற வேண்டியது தொடர்பான விஷயங்களுக்காகப் புதிதாக உருவாக்கப்பட்டிருக்கும் துறைக்கு அமைச்சராக நியமிக்கப்பட்டிருக்கிறார்.

வெளியுறவுத்துறை அமைச்சராக நியமிக்கப்பட்டிருக்கும் போரிஸ் ஜோன்சன், ஐரோப்பாவுக்கும் உலகின் பிற நாடுகளுக்குமிடையே உள்ள உறவை மீண்டும் புதிய விதத்தில் வடிவமைக்க பிரிட்டனுக்கு இப்போது ஒரு பெரும் வாய்ப்பு கிடைத்திருக்கிறது என்றார்.

கமரனுக்கு நெருக்கமானவராகக் கருதப்பட்ட, பதவி நீக்கம் செய்யப்பட்ட ஜோர்ஜ் ஓஸ்போர்ன், தனது பதவி நீக்கம் குறித்து ட்விட்டர் மூலம் தெரிவித்த கருத்துக்களில், இந்தப் பதவியில் பணிபுரிந்ததை ஒரு கௌரவமாகக் கருதுவதாகவும், தனது செயல்பாடு குறித்து மற்றவர்கள் முடிவு செய்வார்கள் என்றும், ஆனால் தான் வந்தபோது இருந்ததை விட, பிரிட்டிஷ் பொருளாதாரத்தை நல்ல நிலையில் விட்டுச் செல்வதாகவே தான் கருதுவதாகவும் கூறியிருக்கிறார்.