சமூகத்தில் பெண்ணுக்கு வழங்கப்படுகின்ற அங்கீகாரமே அந்த சமூகத்தின் முன்னேற்றத்திற்கு சிறந்த உதாரணம் என ஜனாதிபதி மைத்திரிபால சிறிசேன தெரிவித்துள்ளார்.

மகளிர் தினத்தை முன்னிட்டு வெளியிட்டுள்ள அறிக்கையிலேயே ஜனாதிபதி இதனைக் குறிப்பிட்டுள்ளார்.

பாதுகாப்பான தொழில்களை இலக்காகக் கொண்ட முன்னேற்றகரமான கல்வி மற்றும் தொழில்சார் தகைமைகளை அவர்களுக்கு வழங்கி, சமூகத் தலைமைத்துவத்திற்கு பெண்களை நியமிப்பதற்கான சட்ட ரீதியான மற்றும் சமூக ரீதியான தடைகளை தகர்தெறிவதன் முலமே மகளிரை பொருளாதார ரீதியிலும் வர்த்தக ரீதியிலும் பலப்படுத்த முடியும் என ஜனாதிபதி குறிப்பிட்டுள்ளார்.

இம்முறை மகளிர் தினத்திற்கு வழங்கப்பட்டுள்ள தொனிப்பொருளைக் கொண்டு சமூகத்திற்கு வழங்கப்படும் செய்தியானது வளமான அபிவிருத்தியை நிதர்சனப்படுத்துவதற்காக மகளிரைப் பலப்படுத்த வேண்டும் என்பதாகும் எனவும் ஜனாதிபதி சுட்டிக்காட்டியுள்ளார்.

இதேவேளை, பெண்களுக்கு உரிய கௌரவம், அரவணைப்பு, பாராட்டு மற்றும் அன்பைப் பெற்றுக்கொடுத்து அவர்களை மேம்படுத்தப்பட்ட சமூகப் பயணத்தில் இணைத்துக்கொள்வது முழு சமூகத்தினதும் கடமை என பிரதமர் ரணில் விக்ரமசிங்க தெரிவித்துள்ளார்.