COLOMBO(News1st) - වැලිගම W15 හෝටලයට වෙඩි තැබීමේ සිද්ධිය සම්බන්ධයෙන් හිටපු පොලිස්පති දේශබන්දු තෙන්නකෝන් ඇතුළු පොලිස් නිලධාරින් 9 දෙනෙකුට මාතර මහේස්ත්‍රාත් අධිකරණයේ නඩුව අවසන් කිරිමට මහේස්ත්‍රාත් චතුර දිසානායක අද තීරණය කළේය.

ඒ සිද්ධිය සම්බන්ධයෙන් මාතර මහාධිකරණය හමුවේ අධි චෝදනා පත්‍ර භාරදී ඇති බැවින්,

වැලිගම W15 හෝටලයට වෙඩි තැබීමේ සිද්ධියට අදාළව හිටපු පොලිස්පති දේශබන්දු තෙන්නකෝන් ඇතුළු පොලිස් නිලධාරීන් 09 දෙනකුට එරෙහිව නීතිපතිවරයා විසින් මාතර මහාධිකරණයේ ඉකුත් 07 වැනිදා  අධිචෝදනා ගොනු කළේය.

නිතිපතිවරයා විසින් මාතර මහාධිකරණ විනිසුරු නන්දන අමරසිංහ ඉදිරියේ එම චෝදනා විත්තිකරුවන්ට එදින කියවා භාරදීමෙන් අනතුරුව ඔවුන්  නව දෙනා ඇප මත මුදා හැරියේය.

ඒ , එක් විත්තිකරුවකුට රුපියල් ලක්ෂ දෙකහමාරක මුදල් ඇපයක් සහ රුපියල් ලක්ෂ 100 බැගින් වූ ශරිර ඇප හතරක් මතයි

මෙලෙස අධිචෝදනා කියවා දීමෙන් පසු ඇප ලබා දී ඇත්තේ, හිටපු පොලිස්පති දේශබන්දු තෙන්නකෝන්, කොළඹ අපරාධ කොට්ඨාසයේ එවක වැඩබලන අධ්‍යක්ෂවරයා වූ හිටපු සහකාර පොලිස් අධිකාරී නෙවිල් සිල්වාද එම කොට්ඨාසයේ ස්ථානාධිපති ප්‍රධාන පොලිස් පරීක්ෂක ඇන්සල්ම් ද සිල්වා, පොලිස් පරීක්ෂක මහේෂ් දුනුසිංහ, පොලිස් පරීක්ෂක ජගත් නිශාන්ත, උප පොලිස් පරීක්ෂක රොෂාන් මධුරංග, පොලිස් සැරයන් ප්‍රසන්න කුමාර, පොලිස් කොස්තාපල් සුපුන් ප්‍රියශාන් සහ රියැදුරු පොලිස් කොස්තාපල් ගිහාන් පියතිස්ස යන අයටයි

2023 දෙසැම්බර් 30 වැනිදා රාත්‍රි කාලයේ විශේෂ මෙහෙයුමක් සඳහා කොළඹ අපරාධ කොට්ඨාසයට අයත් පොලිස් නිලධාරීන් 8 දෙනකුගෙන් යුත් කණ්ඩායමක් වෑන් රථයකින් වැලිගම දක්වා ගොස් මෙම වෙඩි තැබීම සිදු කර තිබුණි.

2025 පෙබරවාරි 28 වැනිදා මාතර මහේස්ත්‍රාත් අධිකරණය මෙම සිද්ධිය සම්බන්ධයෙන් එවකට පොලිස්පති දේශබන්දු තෙන්නකෝන් ඇතුළු අටදෙනකු අත්අඩංගුවට ගෙන සැකකරුවන් ලෙස නම් කෙරුණි.

කොළඹ අපරාධ කොට්ඨාසයේ නිලධාරීන් සමඟ අදාල මෙහෙයුමට ගිය පොලිස් සැරයන් උපුල් චමින්ද කුමාර මියගොස් තිබුණේ වැලිගම පොලිසියෙන් එල්ල වූ වෙඩි ප්‍රහාරයකින්.