කපිල චන්ද්‍රසේනගේ බිරිඳට විවෘත වරෙන්තු නිකුත් කරන්නැයි අධිකරණයෙන් නියෝග.

COLOMBO(News1st) - එයාර්බස් ගනුදෙනුව සම්බන්ධයෙන් පවතින නඩුවේ දෙවන සැකකාරිය වන, ශ්‍රී ලංකන් ගුවන් සේවයේ හිටපු ප්‍රධාන විධායක නිලධාරී කපිල චන්ද්‍රසේන මහතාගේ බිරිඳ, ප්‍රියංකා නයෝමාලි විජේනායක මහත්මියට විවෘත වරෙන්තු නිකුත් කරන ලෙස කොටුව මහේස්ත්‍රාත් පසන් අමරසේන මහතා අද (15) නියෝග කළේය.

මෙම නඩුව කැඳවූ අවස්ථාවේදී අපරාධ පරීක්ෂණ දෙපාර්තමේන්තුවේ විමර්ශන නිලධාරීන් විසින් කරන ලද කරුණු දැක්වීම් සලකා බැලූ මහේස්ත්‍රාත්වරයා, ඇය වෙනුවෙන් මීට පෙර නිකුත් කර තිබූ වරෙන්තුව සංශෝධනය කරමින් ඉංග්‍රීසි භාෂාවෙන් විවෘත වරෙන්තු නිකුත් කිරීමට නියෝග කරන ලදී.

මේ අතර, සැකකාරිය වෙනුවෙන් ඇපකරුවන් ලෙස කටයුතු කළ හිටපු ක්‍රිකට් ක්‍රීඩක අරවින්ද ද සිල්වා සහ ඔහුගේ බිරිඳ වන ප්‍රියංගි අනුෂ්කා විජේනායක යන අයව එම ඇපකාරිත්වයෙන් නිදහස් කරන ලෙස ජනාධිපති නීතිඥ අනිල් සිල්වා මහතා අධිකරණයෙන් ඉල්ලා සිටියේය.

එම ඉල්ලීම පිළිබඳව නඩු ගොනුව පරීක්ෂා කළ මහේස්ත්‍රාත්වරයා, අදාළ ඇප මුදල රුපියල් මිලියන 10ක් නොව රුපියල් ලක්ෂ 200ක් (මිලියන 20ක්) බව පෙන්වා දුන්නේය. එම ඇප මුදල් රාජසන්තක කිරීමට පෙර, ඒ සම්බන්ධයෙන් අධිකරණයට කරුණු දක්වන ලෙසත්, ඇපකරුවන් ඇපකාරිත්වයෙන් ඉවත් කිරීමට හේතු ලිඛිතව ගොනු කරන ලෙසත් මහේස්ත්‍රාත්වරයා නියෝග කළේය.

ඇපකරුවන් දෙදෙනාට විදේශගත වීමට අවශ්‍යතාවක් පවතින බව ජනාධිපති නීතිඥවරයා එහිදී වැඩිදුරටත් කියා සිටියේය. මෙම නඩුවේ පළමු සැකකරු වූ කපිල චන්ද්‍රසේන මහතා මේ වන විට මියගොස් ඇත.

නඩුව ලබන 22 වන දින යළි කැඳවීමට නියමිතය.