අලුත් අවුරුද්ද වෙනුවෙන් අදත් විශේෂ ප්‍රවාහන සේවා...

COLOMBO (News 1st) - අලුත් අවුරුද්ද වෙනුවෙන් ගම්බිම් බලා යන ජනතාවගේ පහසුව සඳහා විශේෂ ප්‍රවාහන සේවා අද (13) දිනයෙත් ක්‍රියාත්මක බව ප්‍රවාහන, මහාමාර්ග සහ නාගරික සංවර්ධන අමාත්‍යාංශය පවසයි.

ඒ සඳහා ජාතික ගමනා ගමන කොමිෂන් සභාවේ අධීක්ෂණය යටතේ ශ්‍රී ලංකා ගමනා ගමන මණ්ඩලයේ සහ මාර්ගස්ථ මගී ප්‍රවාහන අධිකාරි සේවා බස් රථ දවසේ පැය 24 පුරාම ක්‍රියාත්මකයි.

එම ඒකාබද්ධ ප්‍රවාහන වැඩපිළිවෙල සඳහා අතිරේක බස් රථ 1,500 ක් යෙදවීමට ලංගමය පියවර ගෙන තිබේ.

ජාතික ගමනා ගමන කොමිෂන් සභාවේ අධීක්ෂණය යටතේ මාකුඹුර බහුවිධ ප්‍රවාහන මධ්‍යස්ථානය සහ කොළඹ පිටකොටුව මධ්‍යම බස් නැවතුම් පර්යන්තයේ සිට මගී අවශ්‍යතාවය පරිදි බස් සේවා ක්‍රියාත්මකයි.

පසු අවුරුදු ප්‍රවාහන සැලැස්ම යටතේ අප්‍රේල් 16 සිට 21 දක්වා ගම්බිම්වල සිට කොළඹට පැමිණීමටත් මේ විශේෂ බස් රථ සේවා ක්‍රියාත්මක කරන බව ප්‍රවාහන, මහාමාර්ග සහ නාගරික සංවර්ධන අමාත්‍යාංශය සඳහන් කළේ ය.

අමාත්‍යාංශය පැවසුවේ අනෙකුත් සියලුම පළාත්වලද ලංගම සහ මාර්ගස්ථ මගී ප්‍රවාහන අධිකාරිය සමග ඒකාබද්ධව මගීන්ට අවශ්‍ය ප්‍රවාහන පහසුකම් ක්‍රමවත් කිරීමට පියවර ගෙන ඇති බවයි.

ජාතික ගමනා ගමන කොමිෂන් සභාවේ අධ්‍යක්ෂ ජනරාල් නිලාන් මිරැන්ඩා පැවසුවේ මගීන්ට සිදුවන අපහසුතා පරීක්ෂා කිරීම සඳහාද විශේෂ වැඩපිලිවෙලක් ක්‍රියාත්මක බවයි.

1955 අංකයට මගී ජනතාවට පවතින ගැටලු ඉදිරිපත් කිරීමට හැකියාව ඇතැයිද, ඔහු පැවසුවේ ය.

මේ අතර අලුත් අවුරුද්දට ගම් බිම් බලා යන ජනතාව වෙනුවෙන් විශේෂ දුම්රිය සේවාව ලබන 19 වැනිදා දක්වා ක්‍රියාත්මක වේ.

ඒ අනුව කොළඹ කොටුව - අනුරාධපුරය, අනුරාධපුරය - කන්සන්තුරය,  මරදාන - මාතර සහ  මරදාන - බෙලිඅත්ත අතර විශේෂ දුම්රිය සේවා ක්‍රියාත්මකයි.

බෙලිඅත්ත සිට මහව දක්වා ධාවනය වූ රජරට රැජිණි දුම්රිය, අලුත් අවුරුදු කාලසීමාව තුළ අනුරාධපුරය දක්වා ධාවනය වන බව, දුම්රිය දෙපාර්තමේන්තුව සඳහන් කළේ ය.

කොළඹ සිට ගම්බිම් බලා යාමට මෙන්ම, යළි කොළඹට පැමිණීම සදහා ද, එම විශේෂ දුම්රිය සේවා ක්‍රියාත්මක වේ.