රියදුරු බලපත්‍ර ලක්ෂ 4ක් මුද්‍රණය අවසන් කර තැපෑලට

COLOMBO(News1st) - රියදුරු බලපත්‍ර ලක්ෂ හතරක් මුද්‍රණය අවසන් කර තැපෑලට යොමු කර ඇති බව මෝටර් රථ ප්‍රවාහන දෙපාර්තමේන්තුව පවසයි.

එහි කොමසාරිස් ජනරාල් කමල් අමරසිංහ සඳහන් කළේ, තවත් ලක්ෂයක් පමණ මුද්‍රණය කිරීමට පවතින බවයි. 
 

වේරහැර, අනුරාධපුර සහ මාතර දිස්ත්‍රික් කාර්යාලවලින් මේ වනවිට රියදුරු බලපත්‍ර ලබා ගැනීමේ පහසුකම් සලසා තිබේ. 
 

දැනට ලැබී ඇති අයැදුම්පත් සඳහාද රියදුරු බලපත්‍ර කාඩ්පත් නිකුත් කරන බව කොමසාරිස් ජනරාල්වරයා සඳහන් කළේය. 

ඔහු පැවසුවේ, රියදුරු බලපත්‍ර මුද්‍රණය කිරීමට අවශ්‍ය කාඩ් ලක්ෂ අටක් පමණ මෙරටට ආනයනය කර ඇති බවයි.

තවත් රියදුරු බලපත්‍ර මුද්‍රණයට අවශ්‍ය කාඩ් පත් ලක්ෂ දහයක් පමණ ආනයනයට ටෙන්ඩර් විවෘත කර ඇති බවද මෝටර් රථ ප්‍රවාහන කොමසාරිස් ජනරාල් වරයා ප්‍රකාශ කළේය. 
 

වසර දෙකකට අධික කාලයක සිට රියදුරු බලපත්‍ර සඳහා කාඩ්පත් නිකුත් කිරීම අත්හිටුවා තිබුණි.

ඒ සඳහා පසුගිය කාලය තුළ නිකුත් කෙරුණේ තාවකාලික බලපත්‍රයක් පමණයි.