සිංගප්පූරු අයවැය 2026: AI සහ ගෝලීය වෙළෙඳපොළ ජයගැනීමේ දැවැන්ත සැලසුම් රැසක්

COLOMBO (News 1st) -සිංගප්පූරු රජය විසින් 2026 වසර සඳහා වන සිය නවතම අයවැය ප්‍රකාශයට පත් කර ඇත. අග්‍රාමාත්‍ය ලෝරන්ස් වොන්ග් විසින් ඉදිරිපත් කරන ලද මෙම අයවැය මගින් කෘතිම බුද්ධිය (AI) සහ දේශීය ව්‍යාපාර ජාත්‍යන්තරයට රැගෙන යාම සඳහා පෙර නොවූ විරූ මූල්‍ය ප්‍රතිපාදන ප්‍රමාණයක් වෙන් කර තිබේ.

අයවැයේ ඇතුළත් ප්‍රධාන විශේෂතා:

1. කෘතිම බුද්ධිය (AI) ජාතික මෙහෙයුමක් ලෙස:

සිංගප්පූරුව කෘතිම බුද්ධිය සිය ආර්ථිකයේ ප්‍රධාන සාධකයක්  බවට පත් කරමින් නව ජාතික AI කවුන්සිලයක් පිහිටුවීමට පියවර ගෙන ඇත. විශේෂයෙන්ම නිෂ්පාදන, සෞඛ්‍ය සහ සැපයුම් දාම (Logistics) වැනි ක්ෂේත්‍රයන් හි කාර්යක්ෂමතාව ඉහළ නැංවීමට "AI මෙහෙයුම්" ක්‍රියාත්මක කෙරේ. ව්‍යාපාරික අංශය සඳහා AI තාක්ෂණය හඳුන්වා දීමට දිරිගැන්වීමක් ලෙස, ඒ වෙනුවෙන් වියදම් කරන මුදලට 400% ක බදු සහනයක් ලබා දීමට රජය තීරණය කර ඇත.

2. "Go-Global" මගින් ව්‍යාපාර ජාත්‍යන්තරයට:

සිංගප්පූරු රජය දේශීය ව්‍යාපාරිකයින්ට ලෝක වෙළඳපොළ ජය ගැනීම සඳහා සෘජුවම අතහිත දීමට සූදානම් වේ. එහිදී "වෙළඳපොළ සූදානම් කිරීමේ ආධාර" (MRA) වැඩසටහන යටතේ, ව්‍යාපාරයක් විදේශයක ස්ථාපිත කිරීමේදී වැය වන පිරිවැයෙන් 70% ක් දක්වා රජය විසින් දරනු ලබයි. මෙය කුඩා හා මධ්‍ය පරිමාණ ව්‍යවසායකයින්ට සිය සීමාවන් පුළුල් කරගැනීමට ලැබෙන වටිනා අවස්ථාවකි.

3. ශ්‍රම බලකාය සඳහා නොමිලේ AI දැනුම සහ ප්‍රවේශය:

තාක්ෂණය සමඟ ඉදිරියට යාමට සියලුම පුරවැසියන් සන්නද්ධ කරමින්, පිළිගත් AI පාඨමාලාවක් හදාරන ඕනෑම පුද්ගලයෙකුට ලොව උසස්ම AI මෙවලම් (Premium AI Tools) මාස 6ක කාලයක් සඳහා නොමිලේ භාවිත කිරීමට රජය අවස්ථාව ලබා දෙයි. මෙහි අරමුණ වන්නේ දැනුමට පමණක් සීමා නොවී, ප්‍රායෝගිකව තාක්ෂණය භාවිත කරන ශ්‍රම බලකායක් නිර්මාණය කිරීමයි.

4. නව ව්‍යවසායකයින් වෙනුවෙන් ඩොලර් බිලියනයක අරමුදලක්: 

නව නිපැයුම් සහිත ආරම්භක ව්‍යාපාර (Startups) දියුණු කිරීම සහ ඒවා දේශීයව රඳවා ගැනීම සඳහා ඩොලර් බිලියනයක අතිරේක ප්‍රාග්ධනයක් වෙන් කර ඇත. මෙමගින් සිංගප්පූරුව ලෝකයේ ප්‍රමුඛතම නව නිපැයුම් මධ්‍යස්ථානයක් ලෙස තවදුරටත් තහවුරු වනු ඇත.

මෙම අයවැය හරහා සිංගප්පූරු රජය අපේක්ෂා කරන්නේ වෙනස්වන ලෝක ආර්ථික රටාව තුළ තාක්ෂණයෙන් සන්නද්ධ, ශක්තිමත් සහ ගෝලීයව සම්බන්ධ වූ ජාතියක් බවට පත්වීම බව ආර්ථික විශ්ලේෂකයින් සඳහන් කරයි.