ආණ්ඩු විරෝධී විරෝධතා හමුවේ ඉරානය පුරා අන්තර්ජාල සේවාව සම්පූර්ණයෙන් අක්‍රීය කර ඇති බව අන්තර්ජාල නිරීක්ෂණ ආයතනයක් වන NetBlocks වාර්තා කරයි.

COLOMBO (News 1st) - ඉරානය පුරා අන්තර්ජාල සබඳතා බිඳවැටීමක් සිදුව ඇතැයි විදෙස් මාධ්‍ය වාර්තා කර තිබේ. ("nationwide internet blackout")

ඒ සයිබර් ආරක්ෂාව සහ අන්තර්ජාල-පාලනය නිරීක්ෂණ ආයතනයක් වන "නෙට් බ්ලොක්ස්" විසින් වාර්තා කර ඇති දත්ත උපුටා දක්වමින් ය.

BBC පුවත් සේවය වාර්තා කළේ ඉරාන මාධ්‍ය ආයතන කිහිපයක වෙබ් අඩවි වෙත පිවිසීමට උත්සහ කළද, එයද ව්‍යර්ථ වූ බවය.

කෙසේ නමුත් ඉරාන රජය විසින් රට පුරා අන්තර්ජාලය අවහිර කර ඇතිද හෝ නැතිද යන්න මෙතෙක් අනාවරණය වී නැත.

අද අඛණ්ඩව 13 වැනි දිනටත් ඉරානයේ ඉහළ යන ජීවන වියදමට සහ ආණ්ඩුවට එරෙහි විරෝධතා පැවැත්වේ.

දෙසැම්බර් 28 වැනිදා, ටෙහෙරාන් අගනුවර වෙළඳුන් පිරිසක් ආරම්භ කළ විරෝධතා මේ වන විට එරට පළාත් 31 පුරාම ව්‍යාප්ත වී ඇතැයි විදෙස් වාර්තා වල සඳහන් වේ.