මෙරට දූෂණ විරෝධී වැඩපිළිවෙළට අඛණ්ඩව සහාය දක්වන බව ට්‍රාන්ස්පේරන්සි ඉන්ටර්නැෂනල් ආයතනයේ සභාපති ජනාධිපති ලේකම් හමුවී කියයි...

COLOMBO (News 1st) - මෙරට දූෂණ විරෝධී වැඩපිළිවෙළට අඛණ්ඩව සහාය දක්වන බව ට්‍රාන්ස්පේරන්සි ඉන්ටර්නැෂනල් සභාපති, ෆ්‍රැන්සුවා වැලරියන් මහතා පවසයි.

මෙරට සංචාරයක නිරත ට්‍රාන්ස්පේරන්සි ඉන්ටර්නැෂනල් සභාපතිවරයා ඒ බව සඳහන් කළේ, ජනාධිපති කාර්යාලයේදී ජනාධිපති ලේකම් නන්දික සනත් කුමානායක මහතා සමග පැවැති සාකච්ඡාවකදී යි.

රාජ්‍ය සහ පෞද්ගලික යන අංශ දෙකෙහි පවත්නා දූෂණයට එරෙහිව කටයුතු කිරීම සඳහා රජය දරන අඛණ්ඩ ප්‍රයත්නය පිළිබඳ ෆ්‍රැන්සුවා වැලරියන් මහතා වෙත, ජනාධිපති ලේකම්වරයා එහිදි පැහැදිලි කළේ ය.

ඔහු සඳහන් කළේ දූෂණ විරෝධී යාන්ත්‍රණය ශක්තිමත් කිරීම සඳහා රජය නව වැඩපිළිවෙළ කිහිපයක්ම ආරම්භ කර ඇති අතර ඒවා දැනටමත් සැලකිය යුතු ප්‍රගතියක් පෙන්නුම් කර ඇති බවයි.

අල්ලස සහ දූෂණය තුරන් කිරීම, රාජ්‍ය අරමුදල් ඵලදායී ලෙස භාවිතා කිරීම සහතික කිරීම සහ රට තුළ සුපිළිපන් සංස්කෘතියක් ඇති කිරීම යන පුළුල් අරමුණු ඇතිව අල්ලස සහ දූෂණය පිළිබඳ මහජනතාව දැනුවත් කිරීම සඳහාද වැඩසටහන් ක්‍රියාත්මක කර ඇති බව ජනාධිපති ලේකම්වරයා එහිදී ප්‍රකාශ කළේ ය.

අල්ලස සහ දූෂණය වැළැක්වීම සඳහා රාජ්‍ය ආයතන තුළ අභ්‍යන්තර කටයුතු ඒකක පිහිටුවීම මෙන්ම, ක්ලීන් ශ්‍රී ලංකා වැඩසටහන යටතේ හඳුන්වා දුන් පියවරද අගය කළ ට්‍රාන්ස්පේරන්සි ඉන්ටර්නැෂනල් සභාපතිවරයා අවධාරණය කළේ, දූෂණ විරෝධී ඉලක්ක ඉදිරියට ගෙන යාමේදී රජය සහ සිවිල් සමාජය ඒකාබද්ධව කටයුතු කිරිම වැදගත් බවයි.