යුද හමුදා බස් රථ යොදා ගනිමින් තැපැල් භාණ්ඩ ප්‍රවාහනය ඇරඹෙයි.. තැපැල් සේවක වර්ජනය අඛණ්ඩව..

COLOMBO (News 1st) - යුද හමුදා බස් රථ යොදා ගනිමින් මධ්‍යම තැපැල් හුවමාරුවේ ගොඩගැසී තිබූ තැපැල් භාණ්ඩ විවිධ ප්‍රදේශ වෙත යොමු කළ බව තැපැල්පති රුවන් සත්කුමාර මහතා පවසයි.

තැපැල්පතිවරයා පැවසුවේ තැපැල් පර්යන්ත වෙත එලෙස භාණ්ඩ හා ලිපි යොමු කළ බවයි.

අතිකාල දීමනා ගැටලුව, ඇඟිලි සලකුණු යන්ත්‍රවල පැමිණීම සහ පිටවීම සටහන් කිරීමේ ගැටලුව ඇතුළු කරුණු 19 ක්  මුල් කර ගනිමින් පසුගිය සඳුදා සිට වැඩවර්ජනය ක්‍රියාත්මකයි.

එක්සත් ජාතික තැපැල් සේවක සංගමය, ශ්‍රී ලංකා නිදහස් තැපැල් හා විදුලි පණිවුඩ පොදු සේවක සංගමය, එක්සත් තැපැල් හා විදුලි සංදේශ සේවක සංගමය, ශ්‍රී ලංකා නිදහස් තැපැල් සේවා සංගමය, ශ්‍රී ලංකා තැපැල් සේවක පෙරමුණ ඇතුළු වෘත්තිය සමිති 23 ක් ඊට සහය දක්වයි.

ඔවුන් ඊයේ කොළඹ මධ්‍යම තැපැල් හුවමාරුව ඉදිරිපිට දී අඛණ්ඩ සත්‍යග්‍රහයක්ද ආරම්භ කළේ ය.

මේ අතර දිවයින පුරා තැපැල් කාර්යාල 653 න් ඊයේ දිනයේ විවෘතව පැවැති සංඛ්‍යාව 169 කි.

උප තැපැල් කාර්යාලය සංඛ්‍යාව, 3211 ක් ඊයේ විවෘතව පැවැතියේ ය.

මේ අතර, සෞඛ්‍ය හා ජනමාධ්‍ය නියෝජ්‍ය අමාත්‍ය වෛද්‍ය හන්සක විජේමුනි මහතා පැවසුවේ තැපැල් සේවකයිගේ ඉල්ලීම්වලින් දෙකක් හැර සෙසු ඉල්ලීම් සාකච්ඡා මාර්ගයෙන් විසදා ගැනීමට හැකියාව ඇති බවයි.

තැපැල් වෘත්තීය සමිති කිහිපයක වර්ජනය හේතුවෙන් මේ වන විට රුපියල් මිලියන 100 ත් 120 ත් අතර පාඩුවක් සිදුව ඇති බව තැපැල් දෙපාර්තමේන්තුව සඳහන් කළේ ය.