හිටපු ප්‍රාදේශීය සභා මන්ත්‍රීවරයෙකු වෙඩි තබා ඝාතනය කෙරේ...

COLOMBO (News 1st) - එක්සත් ජාතික පක්ෂ හිටපු ප්‍රාදේශීය සභා මන්ත්‍රී ශාන්ත මුදුන්කොටුව මහතාට වෙඩි තැබීමට වෙඩික්කරුවන් පැමිණි මෝටර් රථය සහ එහි රියැදුරු බත්තරමුල්ල තලංගම ප්‍රදේශයේදී අත්අඩංගුවට ගෙන තිබේ.

ඒ, සිද්ධියෙන් පසු වෙඩික්කරුවන් පලා ගිය මෝටර් රථය සොයා පොලිසිය කළ විශේෂ මෙහෙයුමකින් අනතුරුවයි.

අද (12) දහවල් මීගොඩ ආටිගල පාරේ සිදුවූ වෙඩි තැබීමෙන් එක්සත් ජාතික පක්ෂ හිටපු ප්‍රාදේශීය සභා මන්ත්‍රී ශාන්ත මුදුන්කොටුව මහතා මිය ගියේ ය.

ඔහු යතුරු පැදියකින් ගමන් කරමින් සිටියදී, මෝටර් රථයකින් පැමිණ පිරිසක් වෙඩි තැබීම සිදුකර, පළාගොස් ඇතැයි පොලිසිය පැවසුවේය.

වෙඩි තැබීම පිස්තෝලයකින් සිදුකර ඇතැයි, සඳහන්.

වෙඩි වැදීමෙන් තුවාල ලැබූ ශාන්ත මුදුන්කොටුව මහතා හෝමාගම රෝහලට ඇතුළත් කිරීමෙන් පසු මියගොස් තිබේ.

46 හැවිරිදි ශාන්ත මුදුන්කොටුව මහතා වටරැක පාදුක්ක ප්‍රදේශයේ පදිංචි කරුවෙක්.