මාස 5ක් තුළ අල්ලස් චෝදනා මත සැකකරුවන් 31 දෙනෙකු අත්අඩංගුවට

COLOMBO (News1st) - මාස 5 ක් ඇතුලත අල්ලස් හෝ දූෂණ චෝදනා සම්බන්ධයෙන් සැකකරුවන් 31 දෙනෙකු අත්අඩංගුවට ගෙන තිබේ.

අල්ලස් හෝ දූෂණ චෝදනා විමර්ශන කොමිෂන් සභාව පැවසුවේ මේ වසරේ පළමුවැනිදා සිට මැයි 31 වැනිදා දක්වා කාලය තුල සිදුකල වැටලීම් මගින් පොලිස් නිළධාරින් පමණක් 8 දෙනෙකු අත්අඩංගුවට ගෙන ඇති බවයි.

පොලිස් පරීක්ෂකවරයෙකු, උප පොලිස් පරීක්ෂකවරයෙකු, පොලිස් සැරයන්වරු 4 දෙනෙකු, කොස්තාපල්වරු දෙදෙනෙකු ඒ අතර වන බවයි.

අල්ලස් හෝ දූෂණ චෝදනා විමර්ශන කොමිෂන් සභාව පැවසුවේ විදුහල්පතිවරයෙකු, මහජන සෞඛ්‍ය පරීක්ෂකවරුන් දෙදෙනෙකුද අත්අඩංගුවට ගත් පිරිස අතර වන බවයි.

මේ අතර ඊයේ(27) දහවල් අල්ලස් කොමිසමේ විමර්ශන නිළධාරින් විසින් නාවලදී අත් අඩංගුවට ගත් ශ්‍රී ලංකන් ගුවන් සමාගමේ හිටපු සභාපති නිශාන්ත වික්‍රමසිංහ මහතා ලබන පළමුවැනිදා දක්වා රක්ෂිත බන්ධනාගාර ගතකරනු ලැබීය.