පොලිස්පති දේශබන්දුට එරෙහි අධිකරණ අපහාස චෝදනා ගොනුවත් සූදානම්, නීතිපතිවරයා අධිකරණයට දන්වයි....

COLOMBO (News 1st) - පොලිස්පති දේශබන්දු තෙන්නකෝන් මහතාට එරෙහිව ගතයුතු ඉදිරි නෛතික ක්‍රියාමාර්ග ගැනීමට නිතීපතිවරයා සූදානම් බව, නියෝජ්‍ය සොලිසිටර් ජනරාල් යොහාන් අබේවික්‍රම මහතා අද (22) මාතර මහේස්ත්‍රාත් අරුණ බුද්ධදාස මහතාට දැනුම් දුන්නේ ය.

ඒ, දේශබන්දු තෙන්නකෝන් මහතා අධිකරණයට අපහාසයක් කිරීම සම්බන්ධයෙන් සිදුකළ විමර්ශනයේ ගොනුව සකස් කර අවසන් බව සඳහන් කරමිනි.

මාතර, වැලිගම පැලෑන ප්‍රදේශයේ W 15 නමැති හෝටලයේ සිදු වූ වෙඩි තැබීමේ සිද්ධිය සම්බන්ධයෙන් විභාග වන නඩුව අද යළි කැඳවූ අවස්ථාවේ, නියෝජ්‍ය සොලිසිටර් ජනරාල්වරයා ඒ බව සඳහන් කළේ ය.

සිද්ධිය සම්බන්ධයෙන් රක්ෂිත බන්ධනාගාර ගතකර, ඇප ලබා ගැනීමෙන් පසු දේශබන්දු තෙන්නකෝන් මහතා  ක්‍රියාකළ ආකාරයෙන් අධිකරණය අපහාසයක් වී ඇත්දැයි විමර්ශනයක් කළ යුතු බව, පසුගිය අප්‍රේල් 25 වැනිදා මාතර මහේස්ත්‍රාත්වරයා කියා සිටියේ ය.

මහේස්ත්‍රාත්වරයා, නීතිපතිවරයාට දැනුම් දුන්නේ, අධිකරණයට අපහාසක් වී ඇද්ද යන්න සම්බන්ධයෙන් කටයුතු කිරීමට තම අධිකරණයට නෛතික බලයක් නොමැති බැවින්, ඒ සම්බන්ධයෙන් විමර්ශනයක් කර අභියචානාධිකරණය හමුවේ දේශබන්දු තෙන්නකෝන් මහතාට එරෙහිව නඩු ගොනු කරන ලෙසයි.

ඒ අනුව අධිකරණ ආඥාවන් උල්ලංඝණය කිරීම සහ අධිකරණයට අපහස කිරීම යන චෝදනා යටතේ දේශබන්දු තෙන්නකෝන් මහතාට සහ ඇප ලබාදීමෙන් පසු ඔහු මොටර් රථයකින් අධිකරණ සංකීර්ණයෙන් පිටතට රැගෙන ගිය රොෂාන් ලක්ෂිත යන අයට එරෙහිව මෙම නඩුව ගොනුකර ඇත.

සිද්ධිය සම්බන්ධයෙන් චෝදනා එල්ල වී සිටින දේශබන්දු තෙන්නකෝන් ඇතුලු සැකකරුවන් අද අධිකරණය හමුවේ පෙනී සිටියේ ය.

කරුණු සළකා බැලූ මහේස්ත්‍රාත්වරයා, නඩුව ඔක්තෝබර් 10 වැනිදා පෙරවරු 10 ට කැඳවීමට දින නියම කළේ ය.