ජාතික රෝහලේදී මිය ගිය පුද්ගලයාට දුන් ප්‍රතිජීවක ඖෂධය ගැන ඔස්ට්‍රේලියානු විමර්ශන වාර්තාව සෞඛ්‍ය අමාත්‍යාංශයට..

COLOMBO (News 1st) – ජාතික රෝහලේදී මිය ගිය 50 හැවිරිදි පුද්ගලයාට ලබාදුන් ප්‍රතිජීවක ඖෂධය සම්බන්ධයෙන් වන ඔස්ට්‍රේලියානු විමර්ශන වාර්තාව මේ වනවිට ලැබී ඇතැයි සෞඛ්‍ය අමාත්‍යාංශය පවසයි. 

නියෝජ්‍ය සෞඛ්‍ය සේවා අධ්‍යක්ෂ ජනරාල් ජී විජේසූරිය මහතා පැවසුවේ, අදාල පුද්ගලයාට ලබාදුන් කෝ ඇමෙක්සි ක්ලොව් නමැති ප්‍රතිජීවක ඖෂධයේ ගැටලුකාරි තත්ත්වයක් නොවන බවට එම විමර්ශන වාර්තාව පෙන්වාදී ඇති බවයි.

එම රෝගියාගේ ජෛව සාම්පලද වැඩිදුර විමර්ශන සඳහා ඉන්දියාවට යවා ඇති අතර එහි වාර්තා මෙතෙක් ලැබී නැහැ.

කැපුම් තුවාලයකට ප්‍රතිකාර ගැනීමට වරකාපොළ සිට පැමිණි 50 හැවිරිදි පුද්ගලයෙක් පසුගියදා ජාතික රෝහලේ ප්‍රතිකාර ලබමින් සිටියදී ජීවිතක්ෂයට පත් විය. 

පවුලේ ඥාතීන් චෝදනා කළේ, අදාළ ප්‍රතිජීවක ඖෂධය ලබා දීමෙන් පසු ඔහු ගිය බවයි.