කබ්රාල් අද ආර්ථිකය බංකොළොත්වීම වීම පිළිබඳ හේතු සොයන පාර්ලිමේන්තු විශේෂ කාරක සභාව හමුවට..

COLOMBO (News 1st) – ආර්ථික බංකොළොත්භාවය සෙවීමට පත් කළ පාර්ලිමේන්තු විශේෂ කාරක සභාව හමුවට හිටපු මහ බැංකු අධිපති අජිත් නිවාඩ් කබ්රාල් මහතා අද (15)කැඳවා තිබේ. 

එහි සභාපති පාර්ලිමේන්තු මන්ත්‍රි සාගර කාරියවසම් මහතා සඳහන් කළේ, මීට අමතරව පාර්ලිමේන්තු මන්ත්‍රි වජිර අබේවර්ධන මහතාද අද දිනයේ කාරක සභාව හමුවට කැඳවා ඇති බවයි.

ආර්ථිකය බංකොළොත්වීමට හේතුවූ කාරණා සම්බන්ධයෙන් ඔවුන්ගෙන් සාක්ෂි ලබාගැනීමට සැලසුම් කර ඇති බව සාගර කාරියවසම් මහතා ප්‍රකාශ කළේ ය.

මේ අතර, කාරක සභාව හමුවට විශ්වවිද්‍යාල ආර්ථික විද්‍යාඥයින් ඉදිරිපත් කළ වාර්තා අධ්‍යයය කිරීමද මීට සමගාමීව සිදු කෙරෙනු ඇති.

ගෝඨාභය රාජපක්ෂ මහතා ජනාධිපතිවරයා ලෙස පත් වීමෙන් පසු බදු අඩු කිරීම ඇතුළු කරුණු කිහිපයක් මෙරට ආර්ථිකය බංකොළොත්වීමට බලපා ඇති බවට විශ්වවිද්‍යාල ආර්ථික විද්‍යාඥයින් ආදාළ වාර්තාවලින් පාර්ලිමේන්තු විහේෂ කාරක සභාවට පෙන්වා දී තිබේ. 

ආර්ථිකය බංකොලොත්වීමට බලපෑ ඔවුන් පෙන්වා දුන් සෙසු කරුණු අතර 

කොවිඩ් වසංගතයත් සමග ආර්ථික ක්‍රියාවලිය සංකෝචනය වීම

රජය අසීමිත ලෙස ස්වයිරී බැඳුම්කර නිකුත් කිරීම මෙන්ම

පරිභෝජන ආර්ථිකයකට හුරු වීම යන කාරණා ඇතුළත් ය.

සාගර කාරියවසම් මහතා සඳහන් කළේ , ඔවුන් පෙන්වා දුන් කරුණු මත පදනම්ව කාරක සභාවේ ඉදිරි විමර්ශන මෙහෙයවන බවයි.