දිස්ත්‍රික්ක කිහිපයකට උණුසුම් කාලගුණය පිළිබඳ අවවාදාත්මක නිවේදනයක්: පවුල් 132,000කට පානීය ජලය සැපයීමටත් බාධා

COLOMBO (News 1st) - උතුරු, උතුරු මැද හා නැගෙනහිර පළාත් මෙන්ම මොණරාගල දිස්ත්‍රික්කය සඳහා උණුසුම් කාලගුණය පිළිබඳ අවවාදාත්මක නිවේදනයක් නිකුත් කර තිබේ.

කාලගුණ විද්‍යා දෙපාර්තමේන්තුව දැනුම් දෙන්නේ, එම ප්‍රදේශවල උණුසුම් දර්ශකය හෙවත් මිනිස් සිරුරට දැනෙන උෂ්ණත්වය අවධානය යොමු කළ යුතු මට්ටමක පවතින බවයි.

මේ අතර වියළි කාලගුණයත් සමග පවුල් 132,000කට අධික සංඛ්‍යාවකට පානීය ජලය ලබාදීමේ ගැටලු මතුව ඇති බව ජල සම්පාදන හා ජලාපවාහන මණ්ඩලය පවසයි.

සත්ත්ව නිෂ්පාදන හා සෞඛ්‍ය දෙපාර්තමේන්තුවේ අධ්‍යක්ෂ ජෙනරාල් ආචාර්ය හේමාලි කොතලාවල මහත්මිය සඳහන් කළේ, වියළි කාලගුණයෙන් සත්ත්ව සෞඛ්‍යට වන බලපෑම අවම කිරීමට පියවර ගත යුතු බවයි.