ඝාතන රැසකට සම්බන්ධ සැකකරුවෙක් STF වෙඩි පහරින් මරුට

COLOMBO (News 1st) - මිනුවන්ගොඩ, හොරම්පැල්ල ප්‍රදේශයේදී පොලිස් විශේෂ කාර්ය බලකාය සමග සිදු වූ වෙඩි හුවමාරුවකින් පුද්ගල ඝාතන රැසකට සම්බන්ධ සැකකරුවෙකු මියගොස් තිබේ.

පොලීසිය සඳහන් කළේ, ඊයේ (19) රාත්‍රියේ අදාළ සැකකරු අත්අඩංගුවට ගැනීම සඳහා පොලිස් විශේෂ කාර්ය බලකාය මෙහෙයුමක් දියත් කළ බවයි.

මෙහෙයුම සිදුවන අවස්ථාවේ, සැකකරු නිවසේ සැඟව සිටිමින් ආරක්ෂක අංශ දෙසට වෙඩි ප්‍රහාරයක් එල්ල කර ඇත.

පොලීසිය පැවසුවේ, එහිදී පොලිස් විශේෂ කාර්ය බලකාය එල්ල කළ ප්‍රතිප්‍රහාරවලදී සැකකරු මිය ගිය බවයි. 

36 හැවිරිදි ඔහු පසුගිය කාලයේ කොළඹ සිදු වූ වෙඩි තැබීම් රැසකට සම්බන්ධ පුද්ගලයෙක් බව පොලීසිය සඳහන් කළේ ය.