ස්කොට්ලන්තය සහ නෙදර්ලන්තය අද තීරණාත්මක සටනක

COLOMBO (News 1st) - 2023 ලෝක කුසලාන සුදුසුකම් ලැබීමේ ක්‍රිකට් තරගාවලියේ සුපිරි 6 දෙනාගේ වටයේ ස්කොට්ලන්තය සහ නෙදර්ලන්තය අතර තීරණාත්මක තරගය අද (06) පැවැත්වේ.

තරගාවලියේ සුපිරි 6 දෙනාගේ වටයේ මෙතෙක් පැවැති තරගවල ප්‍රතිඵලවලට අනුව ලකුණු 8ක් ලැබූ ශ්‍රී ලංකාව මේ වන විට ද ලෝක කුසලාන තරගාවලියට සුදුසුකම් ලබා අවසන් ය.

අද දිනයේ පැවැත්වෙන තරගයේ ප්‍රතිඵලය අනුව ඊට සුදුසුකම් ලබන අනෙක් කණ්ඩායම තීරණය වේ.

අද තරගයට එක්වන ස්කොට්ලන්තය ලකුණු 6ක් ලබා සුදුකම් ලැබීමේ වටයේ දෙවැනි ස්ථානයේ රැඳී සිටි.

කෙසේ නමුත් ඔවුන්ට හිමි දළ ලකුණු රැස් කිරීමේ වේගය 0.296 කි.

ප්‍රතිවාදී නෙදර්ලන්තය ලකුණු 4ක් ලබා සුපිරි 6 දෙනාගේ ලකුණු සටහනේ සිව්වැනි ස්ථානයේ රැඳී සිටි.

ඔවුන් පවත්වාගෙන යන දළ ලකුණු රැස් කිරීමේ වේගය සටහන් වන්නේ -0.042 ක් ලෙසයි.

අද දිනයේදී ස්කොට්ලන්තය තරගය ජය ගතහොත් ඔවුන්ට ලෝක කුසලාන තරගාවලියට එක් වීමේ අවස්ථාව හිමි වේ.

යම් හෙයකින් නෙදර්ලන්තය තරග ජය ගැනීමට සමත්වුවහොත් දෙපිලේම ලකුණු සංඛ්‍යාව 6ක් ලෙස සමාන අගයක් ගනු ඇති.

එවිට දළ ලකුණු රැස් කිරීමේ වේගය අනුව ලෝක කුසලාන තරගාවලියට සුදුසුකම් ලබන අනෙක් කණ්ඩායම තීරණය වේ.

කෙසේ වෙතත් නෙදර්ලන්තයට එම අවස්ථාව ලබා ගැනීමට නම් ඔවුන් ලකුණු 32කට  වඩා ඉහළ ලකුණු පරතරයක් පවත්වා ගනිමින් තරගය ජය ගැනීම සිදු කළ යුතුයි. 

එවිට දළ ලකුණු රැස් කිරීමේ වේගය ස්කොට්ලන්තයට වඩා ඉහළ අගයක් පවත්වා ගැනීමට ඔවුන්ට හැකි වේ.

සිම්බාබ්වේ බුලවායෝහිදී පැවැත්වෙන අද තරගය මෙරට වෙලාවෙන් දහවල් 12.30ට ආරම්භ කිරීමට නියමිතය.

තරගාවලියේ නිල දේශීය විකාශන අයිතිය හිමි TV1 සහ සිරස TV නිල වෙබ් අඩවිය ඔස්සේ මෙම තරගය සජීව ලෙස ඔබ වෙත ගෙන ඒමට අපි සූදානම් වේ.