නොරොච්චොලේ තුන්වැනි ජනන යන්ත්‍රය දින 100කට අක්‍රිය කරනවා - විදුලි බල ඇමති

COLOMBO (News 1st) - අලුත්වැඩියාවක් සඳහා නොරොච්චොලේ තුන්වැනි ජනන යන්ත්‍රය, ජුනි 13 වැනිදා සිට දින 100ක් අක්‍රිය කර තැබෙන බව, විදුලි බල හා බලශක්ති අමාත්‍ය කංචන විජේසේකර මහතා පවසයි.

අමාත්‍යවරයා ඒ බව සඳහන් කළේ, ට්විටර් පණිවිඩයක්  නිකුත් කරමිනි.

එසේ වුවත් අනෙකුත් තාප බලාගාර යොදා ගනිමින්, ජනතාවට කිසිදු බාධාවකින් තොරව, අඛණ්ඩව විදුලිය සැපයුම සිදුකිරීමට අවශ්‍ය ක්‍රියාමාර්ග ගන්නා බව ද, අමාත්‍යවරයා සඳහන් කළේ ය.

ඒ අනුව විදුලි බල උත්පාදනය සඳහා අවශ්‍ය ගල් අඟුරු, 30 වැනි නෞකාව ගොඩබෑමත් සමග විදුලිබල මණ්ඩලයට අවශ්‍ය ගල්අගුරු තොග සම්පුර්ණ වනු ඇතැයි ද, අදාළ ට්විටර් පණිවිඩයේ  වැඩිදුරටත් දැක්වේ.