තෙල් සංස්ථාව පෞද්ගලීකරණයට එරෙහි සත්‍රයග්‍රහය තවදුරටත්

කර්තෘ Staff writer

28 Mar, 2023 | 8:56 am

කර්තෘ Staff writer 28 Mar, 2023 | 8:56 am

COLOMBO (News1st) – ලංකා ඛණිජ තෙල් නීතිගත සංස්ථාව පෞද්ගලීකරණය කිරීමට එරෙහිව ආරම්භ කළ සත්‍යග්‍රහය මේ වනවිටත් ක්‍රියාත්මකයි.

මෙම සත්‍යග්‍රහයට විධායක නිලධාරීන්ගේ වෘත්තිය සමිති හැර සියලු වෘත්තිය සමිති එක්ව සිටී.

ශ්‍රී ලංකා නිදහස් සේවක සංගමයේ ඛණිජ තෙල් ශාඛාවේ සභාපති ජගත් විජේගුණරත්න මහතා පැවුසුවේ, ඉදිරියේදී ගන්නා ක්‍රියාමාර්ග පිළිබඳව අද දිනයේදී සාකච්ඡා කර තීරණයකට එළැබෙන බවයි.

ඉන්ධන පිරවුම්හල් පෞද්ගලික සමාගම්වලට ලබාදීමට කැබිනට් අනුමැතිය ලබාදීම ඉතා අවාසනාවන්ත තත්ත්වයක් බව ද ජගත් විජේගුණරත්න මහතා පැවසීය .

ලංකා ඛණිජ තෙල් නීතිගත සංස්ථාව පෞද්ගලීකරණය කිරීමට එරෙහිව ඛණිජ තෙල් සේවකයින් මෙම සත්‍යග්‍රහයේ ආරම්භ කළේ, ඊයේ උදෑසනයි.

මේ අතර, විදෙස් සමාගම් තුනකට මෙරට ඉන්ධන වෙළඳපොළට ඇතුල්වීම සඳහා බලපත්‍ර පිරිනැමීමට කැබිනට් අනුමැතිය ඊයේ හිමි විය.

ඒ, චීනයේ සිනොපෙක්, ඕස්ට්‍රේලියාවේ යුනයිටඩ් පෙට්‍රෝලියම් සහ අමෙරිකාවේ ආර්. එම්. පාක්ස්. යන සමාගම්වලටයි.

විදුලිබල හා බලශක්ති අමාත්‍ය කංචන විජේසේකර මහතා ඊයේ පැවති කැබිනට් රැස්වීමෙන් අනතුරුව ට්විටර් පණිවිඩයක් නිකුත් කරමින් මේ බව සඳහන් කළේ ය.

මෙම සමාගම් 3 සඳහා දැනට ඛනජ තෙල් නීතිගත සංස්ථාව විසින් පවත්වාගෙන යනු ලබන, අලෙවි නියෝජිතයින් විසින් මෙහෙයවන ඉන්ධන පිරවුම්හල් 150 බැගින් වෙන් කෙරෙන බව එම පණිවිඩයේ සඳහන් ය.

අදාළ සමාගම් මෙරට පැමිණිමෙන් පසු තවත් නව ඉන්ධන පිරවුම්හල් 50 බැගින් ස්ථාපනය කිරීමට ද අනුමැතිය හිමිවනු ඇති බව අමාත්‍යවරයාගේ ට්විටර් පණිවිඩයේ දැක්වේ.

මෙම සමාගම්වලට ලැබෙන බලපත්‍රය ශ්‍රී ලංකාව තුළ ඛණිජ තෙල් නිෂ්පාදන ආනයනය කිරීමට, ගබඩා කිරීමට, බෙදා හැරීමට සහ අලෙවි කිරීමට වසර 20 ක කාලයක් සඳහා බලාත්මක වනු ඇති.

මේ අතර, ලංකා ඉන්දීය තෙල් සමාගමේ කළමනාකාර අධ්‍යක්ෂ මනෝජ් ගුප්තා මහතා ට්විටර් පණිවුඩයක් නිකුත් කරමින් පැවසුවේ, මාර්තු මාසය තුළ නව පිරවුම්හල් 34 ක මෙහෙයුම් ආරම්භ කිරීමට නියමිත බවයි.