දේශපාලන සිරකරුවන් නිදහස් කර ගැනීම වෙනුවෙන් අමෙරිකාවෙන් නව ප්‍රවර්ධන වැඩසටහනක්

කර්තෘ Staff writer

13 Jan, 2023 | 6:57 pm

කර්තෘ Staff writer 13 Jan, 2023 | 6:57 pm

COLOMBO ( News 1st ) – අසාධාරණ ලෙස සිරගත කර ඇති දේශපාලන සිරකරුවන් නිදහස් කරගැනීම වෙනුවෙන් අමෙරිකාව නව දේශපාලන ප්‍රවර්ධන වැඩසටහනක් ආරම්භ කර තිබේ.

අමෙරිකානු රාජ්‍ය දෙපාර්තුමේන්තුව පවසන්නේ, ජාත්‍යන්තර මානව හිමිකම් ප්‍රඥප්තීන්ට අනුව ලොව වෙසෙන සෑම පුද්ගලයෙකුටම හිමි භාෂණයේ නිදහස, රැස්වීමේ නිදහස ආදී අයිතීන්ට කිසිවෙකුට බලපෑම් කළ නොහැකි බව ය.

දේශපාලන සිරකරුවන් නිදහස් කරගැනීමේ මෙම වැඩසටහනට සහය දෙන ලෙස අමෙරිකාව ලෝකවාසී ජනතාවගෙන් ඉල්ලා සිටින අතර අමෙරිකාව වැඩිදුරටත් පවසන්නේ, ලොව ඇතැම් රටවල රජයන්, නීති අවභාවිත කරමින් ආණ්ඩු විරෝධී පාර්ශ්ව, අන්තගාමීන් හා ත්‍රස්තවාදීන් ලෙස හුවා දැක්වීමට පවා උත්සාහ කරන බව ය.

මේ අතර “යුද අපරාධවල වින්දිතයින් සඳහා වූ යුක්තිය”පනතට එක්සත් ජනපද ජනාධිපති ජෝ බයිඩ්න් අත්සන් තබා තිබේ.

ඊට අනුව යුධ අපරාධ සම්බන්ධයෙන් ලෝකයේ ඕනෑම රටක පුරවැසියෙකුට අමෙරිකානු භූමිය තුළදී නඩු පැවරීමට එක්සත් ජනපද අධිකරණ දෙපාර්තමේන්තුවට බලය පැවරෙන අතර මෙමගින් විදේශ රටවල යුධ අපරාධ චෝදනා එල්ල වූවන් එක්සත් ජනපදයට ඇතුළුවීම දැඩි ලෙස සීමා කිරීමට අපේක්ෂා කෙරේ.