අමෙරිකාවෙන් ලැබුණු P 627 නෞකාව “විජයබාහු” නමින් අධිකාරියට පත් කෙරේ..

by Staff writer 22-11-2022 | 10:05 PM

COLOMBO (News 1st) - P 627 නෞකාව “විජයබාහු” නමින් අධිකාරියට පත් කිරීම ජනාධිපති රනිල් වික්‍රමසිංහ මහතාගේ ප්‍රධානත්වයෙන් අද(22) පස්වරුවේ සිදු කෙරිණි.

අමෙරිකා එක්සත් ජනපද වෙරළාරක්ෂක දෙපාර්තමේන්තුව විසින් ශ්‍රී ලංකා නාවික හමුදාව වෙත එම නෞකාව පසුගියදා ලබාදෙන ලදී.

ජනාධිපති මාධ්‍ය අංශය සඳහන් කළේ සාගර කලාපයේ පොදු සමුද්‍රීය අභියෝග ජය ගැනීම උදෙසා හවුල්කාරිත්වය ශක්තිමත් කිරීමේ සහ වර්ධනය කිරීමේ අරමුණින් එම නෞකාව පසුගියදා අමෙරිකාව විසින් පරිත්‍යාග කළ බවයි.

නාවික නෞකා "විජයබාහු" නමින් අධිකාරියට පත් කිරීමේ උත්සවය ජනාධිපති රනිල් වික්‍රමසිංහ මහතාගේ ප්‍රධානත්වයෙන් අද පස්වරුවේ කොළඹ වරාය, නැගෙනහර පර්යන්තයේ දී සිදු කෙරිණි.

ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සහ ජනාධිපති කාර්යය මණ්ඩල ප්‍රධානී සාගල රත්නායක, ශ්‍රී ලංකාවේ අමෙරිකානු තානාපති ජූලි චන්ග්, ආරක්ෂක ලේකම් ජෙනරාල් (විශ්‍රාමික) කමල් ගුණරත්න, ගුවන් හමුදාපති එයාර් මාර්ෂල් සුදර්ශන පතිරණ, පොලිස්පති සි. ඩී වික්‍රමරත්න යන මහත්වරු ඇතුළු පිරිසක් මෙම අවස්ථාවට එක්ව සිටියහ.