සත්කාරක කටාර් රාජ්‍ය පරදවමින් පාපන්දු ලෝක කුසලානයේ පළමු තරගයේ ජය ඉක්වදෝරයට

COLOMBO (News 1st) – 2022 ලෝක කුසලාන පාපන්දු තරගාවලියේ සත්කාරක කටාර් රාජ්‍යට එරෙහිව පැවති තරගය ඉක්වදෝරය ජය ගත්තේ ය.

මැද පෙරදිග කලාපය සත්කාරකත්වය දරන පළමු ලෝක කුසලාන පාපන්දු තරගාවලිය උත්කර්ෂවත් අන්දමින් කටාර්හීදි ආරම්භ විය. එහි පළමු තරගයට එක් වුණේ, සත්කාරක කටාර් රාජ්‍ය සහ ඉක්වදෝරයයි. තරගයේ 16 වන මිනිත්තුවේදී ඉක්වදෝරය සිය පළමු ගෝලය වාර්තා කළේ ය. ඔවුන් සිය දෙවන ගෝලය රැස් කළේ තරගයේ 31වන මිනිත්තුවේදී ය. ඒ අනුව පළමු අර්ධයේදී ගෝල 2ට 0ක් ලෙස ඉක්වදෝරය තරගයේ පෙරමුණ ගත්තේ ය. දෙවන අර්ධයේදී කණ්ඩායම් දෙකටම ගෝල රැස් කිරීමට හැකි වුණේ නැහැ. ඒ අනුව ඉක්වදෝරය 2022 පාපන්දු ලෝක කුසලාන තරගාවලියේ පළමු තරගය ජය ගත්තේ සත්කාරක කටාර් රාජ්‍ය ගෝල 2ට 0ක් ලෙස පරාජය කරමින් ය. 2022 පාපන්දු ලෝක කුසලානයේ සියලු තරග ඔබට සජිවීව TV1 නාලිකාව ඔස්සේ නැරඹිය හැකියි.