පොලිස් නිලධාරිනියන්ට හිරිහැර කිරීම ගැන මානව හිමිකම් කොමිසමෙන් පරීක්ෂණයක්

COLOMBO (News 1st) - වසන්ත මුදලිගේ මහතා සහ පූජ්‍ය ගල්වැව සිරිධම්ම හිමියන් නිදහස් කරන ලෙස ඉල්ලා ඉකුත් 12 වැනි දා කළුතරින් ආරම්භ කළ පාගමනට පොලීසියෙන් බාධා කිරීම සහ කාන්තා පොලිස් නිලධාරිනියන් දෙදෙනෙකුට පොලිස් නිලධාරියෙකු හිරිහැර කිරීමේ සිද්ධිය සම්බන්ධයෙන් ශ්‍රී ලංකා මානව හිමිකම් කොමිෂන් සභාව පරීක්ෂණයක් ආරම්භ කර තිබේ.

පොලිස්පති සී.ඩී. වික්‍රමරත්න මහතා වෙත ලිපියක් නිකුත් කරමින් ශ්‍රී ලංකා මානව හිමිකම් කොමිෂන් සභාව පවසන්නේ, නීතියේ ආධිපත්‍ය සහ සාමය ආරක්ෂා කිරීම සඳහා ශ්‍රී ලංකා පොලීසියේ විනය පවත්වාගෙන යාමට පොලිස් ප්‍රධානියා ලෙස ඔහු අවශ්‍ය පියවර ගත යුතු බවයි.

පාගමනට බාධා කිරීමට හේතුව, එය ක්‍රියාත්මක කළේ කාගේ නියෝග මත ද, එම අණ හෝ නියෝග ක්‍රියාත්මක කළේ කවුරුන් විසින් ද, අදාළ සිද්ධියට වගකිව යුතු නිලධාරීන්ට එරෙහිව පොලීසිය ආරම්භ කළ ක්‍රියාමාර්ග මොනවා ද යන තොරතුරු පදනම් කරගනිමින්, මානව හිමිකම් කොමිෂන් සභාවට දිවුරුම් ප්‍රකාශයක් මගින් කරුණු ඉදිරිපත්ක කරන ලෙස ද පොලිස්පතිවරයාට මෙම ලිපියෙන් දැනුම් දී තිබේ.