ආන්දෝලනයට ලක් වූ හමර් රථ සිද්ධිය පිළිබඳ පරීක්ෂණ CID යට

by Staff writer 21-10-2022 | 5:31 PM

COLOMBO (News 1st) - නීති විරෝධි ලෙස මෙරටට ආනයනය කළ හමර් වර්ගයේ රථයක් රාජසන්තක කිරීමෙන් පසුව පැවති වෙන්දේසියකදී එය ආනයනය කළ පුද්ගලයාටම ලබාදීමේ සිද්ධිය පිළිබඳව පරීක්ෂණයක් කරන්නැයි අපරාධ පරීක්ෂණ දෙපාර්තමේන්තුවට(CID) භාරදී තිබේ.

ඒ, මුදල් රාජ්‍ය අමාත්‍ය රංජිත් සියඹලාපිටිය මහතාගේ උපදෙස් මත මුදල් අමාත්‍යාංශ ලේකම්වරයා පොලිස්පතිවරයාට කළ දැනුම් දීමක් මතයි.

අදාළ රථය පසුගිය වසරේ පෙබරවාරි 22 වැනි දා නීති විරෝධි ලෙස මෙරටට ආනයනය කර තිබේ.

මුදල් රාජ්‍ය අමාත්‍ය රංජිත් සියඹලාපිටිය මහතා අදාළ සිද්ධිය සම්බන්ධයෙන් රේගු අධ්‍යක්ෂ ජනරාල්වරයාගෙන් මීට පෙර වාර්තාවක් කැඳවා තිබු අතර එම වාර්තාවේ නිර්දේශ මත මෙම පියවර ගෙන ඇතැයි මුදල් අමාත්‍යාංශය නිවේදනය කළේ ය.