පුනරුත්ථාපන කාර්යාංශ පනත් කෙටුම්පතෙන් සටන්කාමීන්, ප්‍රචණ්ඩකාරීන් යන වචන ඉවත් කළ යුතුයි - ශ්‍රේෂ්ඨාධිකරණයෙන් දැනුම්දීමක්

COLOMBO (News 1st) - පුනරුත්ථාපන කාර්යාංශ පනත් කෙටුම්පත තුළ අන්තර්ගත සටන්කාමීන්, ප්‍රචණ්ඩකාරීන් යන වචන පනත් කෙටුම්පතින් ඉවත් කළ යුතු බවත් එය මත්ද්‍රව්‍යවලට ඇබ්බැහි වූවන් පුනරුත්ථාපනයට පමණක් අදාළ කරගත යුතු බවත් ශ්‍රේෂ්ඨාධිකරණය දැනුම් දී ඇතැයි කතානායක මහින්ද යාපා අබේවර්ධන මහතා පාර්ලිමේන්තුවට දැනුම් දුන්නේ ය.

ඒ, අද (20) පාර්ලිමේන්තු කටයුතු ආරම්භ කරමිනි.

මෙම පනත් කෙටුම්පතට එරෙහිව නීතිඥ අමිල එගොඩවත්ත මහතා, පසුගිය සැප්තැම්බර් 29 වැනි දා පළමුවරට ශ්‍රේෂ්ඨාධිකරණයට විශේෂ පෙත්සමක් ගොනුකළ අතර ඉන්පසු තවත් පාර්ශව කිහිපයක් ද එම පෙත්සම අභියෝගයට ලක් කරමින් ශ්‍රේෂ්ඨාධිකරණයට විශේෂ පෙත්සම් කිහිපයක් ගොනු කර තිබුණි.

මෙම පෙත්සම් සම්බන්ධයෙන් විභාගය පසුගිය 04 වැනි දා අවසන් කළ ශ්‍රේෂ්ඨාධිකරණය තම අධිකරණයේ නිගමනය කතානායකවරයා වෙත යොමු කර තිබුණි.

ඒ අනුව අදාළ තීන්දුව කතානායකවරයා විසින් අද පාර්ලිමේන්තුවට දැනුම් දුන්නේ ය.