ඉන්දියානු සාගර කලාපයේ ආරක්ෂාව තහවුරු කරමින් බලගතු ආසියාවක් නිර්මාණය කිරීමට සැලසුම් සකස් කළ යුතුයි - ජනපති -

COLOMBO (News 1st) –  ඉන්දියානු සාගර කලාපයේ ආරක්ෂාව තහවුරු කරමින් ලෝකයට විවෘත කර, බලගතු ආසියාවක් නිර්මාණය කිරීමට සැලසුම් සකස් කළ යුතු බව ජනාධිපති රනිල් වික්‍රමසිංහ මහතා අවධාරණය කරයි. 

ජනාධිපතිතුමා මේ අදහස් පළ කළේ, අද(14) පස්වරුවේ ජාතික ආරක්ෂක විද්‍යායතනයේ උපාධි ප්‍රධානෝත්සවය අමතමින් ය.

2021 වසරේ ආරම්භ කෙරුණු ජාතික ආරක්ෂක විද්‍යායතනයේ ප්‍රථම උපාධි ප්‍රධානෝත්සවය අද පැවැත්වුණේ ජනාධිපති රනිල් වික්‍රමසිංහ මහතාගේ ප්‍රධානත්වයෙන් ය.

එහිදී අධ්‍යයන ආයතනයේ අවශ්‍යතා සම්පූර්ණ කළ විද්‍යාර්ථයින් 31 දෙනෙකුට උපාධි ප්‍රදානය කිරීම ජනාධිපතිතුමා අතින් සිදුවිය.  

ත්‍රිවිධ හමුදාව පොලිසිය හා රාජ්‍ය අංශයේ ඉහළ තනතුරු දරන විධායක නිලධාරීන්ට ජාතික ආරක්ෂාව හා ක්‍රමෝපායික අධ්‍යයනය සම්බන්ධයෙන් අධ්‍යාපනය ලබා දීමේ අරමුණින් මෙරට ස්ථාපිත ප්‍රථම හා උසස් අධ්‍යයන හා පර්යේෂණ ආයතනය මෙය වේ.