රත්නපුරට සැලකිය යුතු මට්ටමේ ගංවතුර තත්ත්වයක් ඇතිවීමේ අවදානමක් - වාරිමාර්ග දෙපාර්තමේන්තුව

COLOMBO (News 1st)  : ඉදිරි පැය 24 තුළ රත්නපුර දිස්ත්‍රික්කයේ පැල්මඩුල්ල , නිවිතිගල, රත්නපුර, කුරුවිට, අයගම සහ ඇලපාත ප්‍රාදේශිය ලේකම් කොට්ඨාසවල පහත්බිම් ආශ්‍රිතව සැලකිය යුතු මට්ටමේ ගංවතුර තත්ත්වයක් ඇතිවිය හැකි බව වාරිමාර්ග දෙපාර්තමේන්තුව පවසයි.

ඒ කළු ගඟේ ජල මට්ටම ඉහළ යාමත් සමගයි.

ඒ අනුව අදාළ ප්‍රදේශවල පදිංචි ජනතාව සහ එම ප්‍රදේශ හරහා ගමන් ගන්නා රියැදුරන් වඩාත් විමසිල්ලෙන් කටයුතු කළයුතු බව වාරිමාර්ග දෙපාර්තමේන්තුව දැනුම් දෙයි.

මේ අතර බස්නාහිර , දකුණු , සබරගමුව, මධ්‍යම සහ ඌව පළාත්වල ඇතැම් ස්ථානවලට මිලිමීටර් 150 ට වැඩි ඉතා තද වැසි ඇතිවිය හැකි බව කාලගුණ විද්‍යා දෙපාර්තමේන්තුව පවසයි.

ඒ පහළ වායු ගෝලයේ කැළඹිලි සහගත තත්ත්වයක් හේතුවෙනි.

කාලගුණ අනාවැකියේ දැක්වෙන්නේ දිවයිනේ සෙසු ප්‍රදේශවලට  මිලිමීටර් 100 ඉක්ම වූ තද වැසි ඇතිවිය හැකි හැකි බවයි.