රනිල් වික්‍රමසිංහ අගමැති ධුරයේ දිවුරුම් දෙයි

COLOMBO (News 1st) – එක්සත් ජාතික පක්ෂයේ නායක රනිල් වික්‍රමසිංහ මහතා අද පස්වරුවේ අග්‍රාමාත්‍ය ධුරයේ දිවුරුම් දුන්නේ ය.

නව අග්‍රාමාත්‍යවරයා ජනාධිපතිවරයා ඉදිරියේ අද පස්වරුවේ දිවුරුම් දුන්නේ ජනාධිපති මන්දිරයේදීයි. රනිල් වික්‍රමසිංහ මහතා මෙවර අග්‍රාමාත්‍ය ධුරයට පත්වූයේ 6 වන වරටයි. 1977 බියගම ආසනය නියෝජනය කරමින් පළමු වරට පාර්ලිමේන්තුවට තේරී පත්වූ රනිල් වික්‍රමසිංහ මහතා එවක පාර්ලිමේන්තුවේ සිටි ලාබාලතම මන්ත්‍රීවරයායි. ඔහු නියෝජ්‍ය විදේශ ඇමතිවරයා ලෙස පත් විය. ඉන් අනතුරුව තරුණ හා අධ්‍යාපන කටයුතු ,කම්කරු ආදී අමාත්‍ය ධුර දැරූ රනිල් වික්‍රමසිංහ මහතා පාර්ලිමේන්තුවේ සභානායකවරයා ලෙසත් කටයුතු කළේ ය. අධ්‍යාපන පීඨ, තරුණ සේවා සභාව, ආයෝජන කලාප ආදිය ඔහු ඇමති ධුර දරන කාලයේ හඳුන්වා දුන් සංකල්ප කිහිපයකි. රනිල් වික්‍රමසිංහ මහතා මුලින්ම අගමැති ධුරයට පත්වූයේ හිටපු ජනාධිපති රණසිංහ ප්‍රේමදාස මහතාගේ හදිසි අභාවයෙන් පසුවයි. මෙවර ඔහු පාර්ලිමේන්තුවට තේරී පත් වන්නේ එක්සත් ජාතික පක්ෂයට හිමි වූ එකම ජාතික ලැයිස්තු මන්ත්‍රී ධුරයෙනි. ඒ අනුව ශ්‍රී ලංකාවේ අග්‍රාමාත්‍ය ධුරයට පාර්ලිමේන්තුවේ එකම ආසනයක් පමණක් හිමි පුද්ගලයකු පත් වන පළමු අවස්ථාව මෙයයි. https://youtu.be/ivOh1m6MiFI