පාර්ලිමේන්තුවේ බහුතරය හා රටේ විශ්වාසය දිනාගත හැකි අගමැතිවරයෙකු හා කැබිනට් මණ්ඩලයක් මේ සතිය තුළ පත්කරනවා - ජනපති

COLOMBO (News 1st) –  පාර්ලිමේන්තුවේ බහුතරය හා රටේ විශ්වාසය දිනාගත හැකි අගමැතිවරයෙකු හා කැබිනට් මණ්ඩලයක් මේ සතිය ඇතුළත පත්කරන බව ජනාධිපති ගෝඨාභය රාජපක්ෂ මහතා පවසයි. 

ජනාධිපතිවරයා මේ බව සඳහන් කළේ ජාතිය අමතා විශේෂ ප්‍රකාශයක් සිදු කරමිනි. රටේ දේශපාලන ස්ථාවරත්වය ඇති කිරීම සඳහා සියලු පක්ෂ නායකයින් සමග කටයුතු කරන බව සඳහන් කළ ජනාධිපතිවරයා කියා සිටියේ,  පාර්ලිමේන්තුවට වඩාත් බලතල හිමිවන ආකාරයට 19 වැනි සංශෝධනයේ අන්තර්ගත දෑ නැවත බලාත්මක වන පරිදි ව්‍යවස්ථා සංශෝධනයක් සිදු කිරීමට ද කටයුතු කරන බවයි. තව ද පත්වන නව රජයේ අගමැතිවරයාට නව වැඩපිළිවෙළක් ඉදිරිපත් කර රට ඉදිරියට ගෙන යාමට අවස්ථාව සලසා දෙන බව ද ජනාධිපතිවරයා ජාතිය අමතා සිදු කළ ප්‍රකාශයෙන් කියා සිටියේ ය. විවිධ පාර්ශ්වවලින් ජනාධිපති ක්‍රමය අහෝසි කරන ලෙස ලැබී ඇති ඉල්ලීම් පිළිබඳ අවධානය යොමු කර පත්වන නව රජය රට ස්ථාවර කිරීමෙන් පසු සියලු දෙනා සමග සාකච්ඡා කර ඒ සඳහා කටයුතු කිරීමටත් ඉඩ ප්‍රස්ථාව සලසා දෙන බව ද ජනාධිපතිවරයා පැවසී ය. අතිශය දුෂ්කර අවස්ථාවේ රට කඩා වැටීමට ඉඩ නොතබා ජන ජීවිතයට අත්‍යවශ්‍ය සියලු දේ සැපයීම සඳහා රාජ්‍ය යාන්ත්‍රණය අඛණ්ඩව ක්‍රියාත්මක කිරීම සඳහා තමන්ට සහය වන ලෙස ඉල්ලා සිටි ජනාධිපතිවරයා සියලු ලාංකිකයින්ගෙන් ඉල්ලා සිටියේ, සාමකාමීව හා කල්පනාකාරීව කටයුතු කරන ලෙසයි. ජනාධිපතිවරයා ජාතිය අමතා සිදු කළ ප්‍රකාශයේදී පසුගිය 9 වැනදා සිදුවූ සිදුවීම් පිළිබඳව ද අදහස් පළ කළේ ය. පසුගිය 9 වනදා ඇති වූ සිදුවීම් තරයේ ප්‍රතික්ෂේප කරමින් ජනාධිපතිවරයා ප්‍රකාශ කළේ, එකී සිදුවීම්වලට පාදක වූ මුල් සිදුවීම පක්ෂපාතීත්වයකින් තොරව දැඩි ලෙස හෙළා දකින බව සහ ඒ සම්බන්ධයෙන් විමර්ශන කටයුතු සිදු කිරීමට පොලිස්පතිවරයාට උපදෙස් දී ඇති බවයි. කෙසේ වෙතත් ඉන් පසුව සිදුවූ මිනීමැරීම්, පහරදීම් බියගැන්වීම්, දේපොළ කොල්ලකෑම් ඇතුළු ම්ලේච්ඡ සිදුවීම් මාලාව සාධාරණීකරණය කිරීමට හැකියාවක් නොමැති බව ද ජනාධිපතිවරයා අවධාරණයෙන් යුතුව කියා සිටියේ ය. සියලු පුරවැසියන්ගේ ආරක්ෂාව තහවුරු කිරීම රජයේ මූලික වගකීම වන බව සිහිපත් කළ, ජනාධිපතිවරයා ප්‍රකාශ කළේ, කලහකාරීන්ට එරෙහිව දැඩි ලෙස නීතිය ක්‍රියාත්මක කරන ලස ත්‍රිවිධ හමුදාවට සහ පොලීසියට උපදෙස් දී ඇති බවයි.