පොලීසිය හා සන්නද්ධ හමුදා ක්‍රියා කළ යුත්තේ පුරවැසි අයිතිය තහවුරු කිරීමටයි.. - නීතිඥ සංගමය

COLOMBO (NEWS1ST) : අද (24) දිනයේ කොළඹ අවට ඇතැම් මාර්ග බාධකවල උල් ඇණ වැනි යමක් සවිකොට කළු ඉටිකොළවලින් ආවරණය කර තැබීමෙන් ජනතාවට බරපතල තුවාල සිදුවිය හැකි තතත්වයක් මතු කිරීම පිළිබදව ශ්‍රී ලංකා නීතීඥ සංගමයේ දැඩි අවධානය යොමු වී තිබේ.

නීතීඥ සංගමය රජයට නැවතත් අවධාරණය කරන්නේ, පොලිස්පති පොලීසිය හා සන්නද්ධ හමුදා ඕනෑම තත්ත්වයකදී ක්‍රියා කළ යුත්තේ, විරෝධතාකරුවන්ගේ හා ජනතාවගේ ආරක්ෂාව සහතික කිරීමටත් සාමකාමී උද්ඝෝෂණ කිරීමේ අයිතිය මෙන්ම නිදහසේ ගමන් කිරීමේ පුරවැසි අයිතිය තහවුරු කිරීම පිණිස බවයි. යම් කිසි හේතුවකින් ප්‍රචණ්ඩකාරී වාතාවරණයක් ඇති වුවහොත් එය රටට දරුණු ප්‍රතිවිපාක අත් කර දීමට තුඩු දිය හැකි බව ද ශ්‍රී ලංකා නීතීඥ සංගමය නිකුත් කළ නිවේදනයේ සඳහන් ය.