උතුරු සහ ප්‍රධාන මාර්ගයේ වෙන් කළ දුම්රිය ආසන ප්‍රවේශපත්‍ර ගාස්තු ඉහළට..

COLOMBO (News 1st) – ප්‍රධාන මාර්ගයේ සහ උතුරු මාර්ගයේ වෙන් කළ ආසන ප්‍රවේශපත්‍ර ගාස්තුව අද(24) සිට වැඩි කළ බව දුම්රිය දෙපාර්තමේන්තුව පවසයි.

එහි නියෝජ්‍ය සාමාන්‍යාධිකාරී වී. එස් පොල්වත්තගේ මහතා සඳහන් කළේ, ඒ අනුව උතුරු මාර්ගයේ කොළඹ කොටුවේ සිට කුරුණෑගල දක්වා පළමු පන්තියට රුපියල් 600ක්ව පැවති ගාස්තුව රුපියල් දහසක් දක්වාත්, කොළඹ කොටුව අනුරාධපුරය පළමු පන්තියේ ගාස්තුව රුපියල් 1200 සිට 1500 දක්වාත් , කොටුව - කන්කසන්තුරය පළමු පන්තියේ ගාස්තුව රුපියල් 1400 සිට 1700 දක්වාත් වැඩි කළ බවයි. මීට අමතරව උතුරු මාර්ගයේ දෙවන හා තුන්වන පන්තිවල වෙන් කළ ආසන ගාස්තුව ද ඉහළ දමා තිබේ. ප්‍රධාන මාර්ගයේ කොළඹ කොටුවේ සිට මහනුවර දක්වා පළමු පන්ති ගාස්තුව රුපියල් දහසේ සිට 1200 දක්වාත්, නානුඔයට රුපියල් 1200 සිට 2000 දක්වාත්, ඇල්ල සහ බදුල්ල යන ගමනාන්ත වෙත පළමු පන්තියේ ගාස්තුව රුපියල් 1500 සිට 2500 දක්වාත් වැඩි කර ඇති බව නියෝජ්‍ය සාමාන්‍යාධිකාරීවරයා පැවසුවේ ය. මීට සාපේක්ෂව එම ගමනාන්ත දක්වා දෙවන හා තුන්වන පන්තිය වෙන්කළ ආසන ගාස්තුව ද වැඩි කර තිබේ. නව වැඩිකිරීම් යටතේ කොළඹ - නුවර නගරාන්තර දුම්රියේ ගාස්තුව ද ඉහළ දැමූ බව දුම්රිය දෙපාර්තමේන්තුව සඳහන් කළේ ය. කෙසේ වෙතත් දුම්රිය සාමාන්‍ය ප්‍රවේශපත්‍ර ගාස්තුව මෙතෙක් ඉහළ දමා නැහැ. එම ගාස්තු සංශෝධනය සඳහා ද සාකච්ඡා පවත්වමින් සිටින බව දුම්රිය නියෝජ්‍ය සාමාන්‍යාධිකාරී වී.එස් පොල්වත්තගේ මහතා සඳහන් කළේ ය.