පෝලිම්වල ජනතාවට ගම්මැද්ද V-Force ක්‍රියාන්විතයෙන් සවියක්..

COLOMBO (News 1st) – අව් වැසි, රෑ දිවා නොබලා මේ දිනවල ඉන්ධන පෝලිම්, ගෑස් පෝලිම්රැවල රැඳී සිටින වැඩිහිටියන් ප්‍රමුඛ ජනතාවට පානීය ජල බෝතල් ලබාදීම සඳහා ගම්මැද්ද V-Force ක්‍රියාන්විතය පෙරට පැමිණ සිටී.

ජනතාව වෙනුවෙන් ක්‍රියාත්මක මෙම වැඩසටහන පිළිබඳ අදහස් දක්වමින් කැපිටල් මහරාජා සමූහයේ විධායක සමූහ අධ්‍යක්ෂ ශෙවාන් ඩැනියෙල් මහතා පැවසුවේ, පීඩාවට පත් ජනතාව මුහුණදී සිටින ගැටලුවට සාපේක්ෂව මෙය කුඩා ප්‍රයත්නයක් බවත් හැකි අයුරින් ජනතාවට උපකාර කිරීම සඳහා ගම්මැද්ද V-Force එක්ව සිටින බවත් ය.

''මේ වනවිට ජනතාව මුහුණදී සිටින ගැටලුවට සාපේක්ෂව මෙය කුඩා ප්‍රයත්නයක්... නමුත් අප සභාපතිතුමා පැහැදිලිව සඳහන් කළේ ජනතාව වෙනුවෙන් අපට හැකි ආකාරයෙන් උපකාරයක් වීම වැදගත් බව‍යි ...''

මූලිකව V-Force ක්‍රියාන්විතය කොළඹ, මහනුවර සහ මාතර යන ප්‍රදේශවලදී මෙම වැඩසටහන ක්‍රියාත්මක කරන අතර ඉදිරි දිනවලදී එය අනෙකුත් ප්‍රදේශවලදීද ක්‍රියාත්මක කිරීමට සැලසුම් කර තිබේ. මේ අතර මේ වනවිට ඇද වැටීම්වලින් මෙරට පෝලීම්වල රැඳී සිටි වැඩිහිටි පුද්ගලයින් තිදෙනෙකු ජීවිතක්ෂයට පත්ව ඇති අතර අධික උණුසුම දරාගත නොහැකිව සිදුවූ ඇදවැටීම් පිළිබඳව ද ඇතැම් ප්‍රදේශවලින් වාර්තා වේ.