විමල් හා ගම්මන්පිල අමාත්‍ය ධුරවලින් ඉවතට

COLOMBO (News 1st) –  කර්මාන්ත අමාත්‍ය විමල් වීරවංශ මහතා හා බලශක්ති අමාත්‍ය උදය ගම්මන්පිල මහතා සිය අමාත්‍ය ධුරවලින් ඉවත් කර තිබේ.

ඒ, ජනාධිපතිතුමාට ආණ්ඩුක්‍රම ව්‍යවස්ථාවේ 47(2)(අ) ව්‍යවස්ථාව යටතේ පැවරී ඇති බලතල ප්‍රකාරව බව ජනාධිපති මාධ්‍ය අංශය නිවේදනයක් නිකුත් කරමින් පවසයි. ඒ අනුව, එම තීරණය අද(03) සිට ක්‍රියාත්මක බව ද ජනාධිපති මාධ්‍ය අංශය වැඩිදුරටත් පවසයි. මේ අතර ගාමිණී ලොකුගේ මහතා බලශක්ති අමාත්‍ය ධුරයේ අද පස්වරුවේ දිවුරුම් දුන්නේය. ඒ, ජනාධිපතිවරයා ඉදිරියේදීය. ගාමිණී ලොකුගේ මහතා දැරූ විදුලිබල අමාත්‍ය ධුරයේ පවිත්‍රා වන්නිආරච්චි මහත්මිය දිවුරුම් දී තිබේ.