යළිත් සංචරණ සීමා පැනවීමේ කිසිදු සූදානමක් නෑ - යුද හමුදාපති

COLOMBO (News 1st) – සීඝ්‍ර කෙරෝනා ව්‍යාප්තිය හමුවේ යළිත් සංචරණ සීමා පැනවීමේ කිසිදු සූදානමක් නැතැයි ආරක්ෂක මාණ්ඩලික ප්‍රධානී යුද හමුදාපති ජෙනරල් ශවේන්ද්‍ර සිල්වා මහතා පවසයි.

යුද හමුදාපතිවරයා පැවසුවේ, මේ මොහොතේ සියලුම රටවැසියන් සෞඛ්‍යාරක්ෂිත ක්‍රම අනුගමනය කරමින් වගකීමෙන් කටයුතු කිරීම අත්‍යවශය කරුණක් බවයි. මේ අතර සමාජය තුළින් හඳුනා ගන්නා කොරෝනා ආසාදිතයින්ගෙන් බහුතරයක් ඔමික්‍රොන් වෛරස් ප්‍රභේදයේ ආසාදිතයින් බව සෞඛ්‍ය ප්‍රවර්ධන කාර්යාංශයේ අධ්‍යක්ෂ විශේඥ වෛද්‍ය රංජිත් බටුවන්තුඩාව මහතා පවසයි. මේ අතර තවත් කොරෝනා ආසාදිතයින් 1331 දෙනෙකු ඊයේ(06) මෙරටින් වාර්තා විය. ඒ අනුව මෙරට සමස්ත කොරෝනා ආසාදිතයින් සංඛ්‍යාව 618, 520කි. තවත් කොරෝනා මරණ 23 ක් ඊයේ දිනයේ වාර්තා වූ අතර රජයේ ප්‍රවෘත්ති දෙපාර්තමේන්තුව සඳහන් කළේ, සෞඛ්‍ය සේවා අධ්‍යක්ෂ ජනරාල්වරයා විසින් එම මරණ පෙරේදි දිනයේ තහවුරු කළ බවය. ඒ අනුව, මේ වනවිට මෙරට කොරෝනා ආසාදනය වීමෙන් පුද්ගලයින් 15,595 දෙනෙකු මියගොස් තිබේ.