රාගම වෛද්‍ය පීඨ ගැටුම : ඇමති පුත්‍රයා අත්අඩංගුවට

COLOMBO (News 1st) –  රාගම වෛද්‍ය පීඨයේ සිද්ධිය සම්බන්ධයෙන් රාජ්‍ය අමාත්‍ය අරුන්දික ප්‍රනාන්දු මහතාගේ පුත්‍රයා පොලිසියට භාරවීමෙන් පසු අත්අඩංගුවට ගෙන තිබේ.

පොලීසිය පැවසුවේ, රාජ්‍ය අමාත්‍යවරයාගේ 23 හැවිරිදි පුත්‍රයා නීතිඥයෙකු මාර්ගයෙන් ඊයේ රාත්‍රී පොලීසියට භාර වී ඇති බවයි. මේ අතර මෙම පහරදීම සඳහා පැමිණි මෝටර් රථයක්  කළුබෝවිල ප්‍රදේශයේදී පොලීසිය භාරයට ගෙන තිබේ. ඒ අනුව සිද්ධියට අදාළව මේ වනවිට සැකකරුවන් 7 දෙනෙකු අත්අඩංගුවට ගෙන ඇති අතර ඔවුන් හඳුනා ගැනීමේ පෙරෙට්ටුවක් සඳහා වැලිසර මහේස්කත්‍රාත් අධිකරණය වෙත ඉදිරිපත් කිරීමට නියමිත බව  පොලීසිය  සඳහන් කළේ ය. රාගම වෛද්‍ය පීඨයේ සිව් වැනි වසරේ පිරිමි නේවාසිකාගාරයේ ඊයේ අලුයම මෙම ගැටුම හට ගෙන තිබිණ. පොලීසිය පැවසුවේ සිව්වන වසරේ සිසුන් හා තුන්වන වසරේ සිසුවෙකු මුල්වී මේ ගැටුම හටගෙන ඇතැයි විමර්ශනවලදී පෙනී ගිය බවයි. ගැටුමෙන් තුවාල ලැබූ තිදෙනෙකු රාගම රෝහලේ සහ එක් අයෙකු මීගමුව රෝහලට ඇතුළත් කර තිබුණි. පොල් සංවර්ධන මණ්ඩලයට අයත් මෝටර් රථයකින් පැමිණි බාහිර පිරිසක් තමන්ට පහරදුන් බව සිව්වන වසර් සිසුන් චෝදනා කළ අතර අදාළ වාහනය හා රියදුරු ඔවුන් සිය භාරයට ගෙන තිබිණ.