රථවාහන තදබදයට විසඳුමක් ලැබෙන නාවල ඇළ හරහා හදන නව පාලමේ ඉදිකිරීම් 60%ක් අවසන් - ඇමති ජොන්ස්ටන්

COLOMBO (News 1st) - ඇතුල්කෝට්ටේ දැඩි රථවාහන තදබදයට පිළියමක් ලෙස රාජගිරිය, නාවල ඇළ හරහා නව පාලමක් ඉදිකිරීමේ කටයුතු මේ වනවිට 60%ක මට්ටමේ පවතින අතර එහි ඉදිකිරීම් කඩිනම් කරන ලෙස මහාමාර්ග අමාත්‍ය ජොන්ස්ටන් ප්‍රනාන්දු මහතා උපදෙස් ලබා දී තිබේ.

අමාත්‍යවරයා මේ බව පැවසුවේ ඊයේ(29) පැවති ප්‍රගති සමාලෝචන රැස්වීමේදීය. ඇතුල්කෝට්ටේ, අංගම්පිටිය මාර්ගය සහ නාවල - රාජගිරිය මාර්ගයේ පාසැල් පටුමග සම්බන්ධ කරමින් රාජගිරිය නාවල ඇළ හරහා මෙම පාලම ඉදි කරනු ලැබේ. මංතීරු දෙකකින් යුත් මෙම නව පාලම මාර්ග සංවර්ධන අධිකාරියේ පූර්ණ අධීක්‍ෂණය යටතේ රාජ්‍ය සංවර්ධන හා සැලසුම් සංස්ථාව විසින් ඉදිකරීම් කටයුතු සිදුකරනු ලබයි . දිගින් මීටර් 600ක් සහ පළල මීටර් 10.4ක් වන මෙම පාලම ඉදිකිරීමට ඇස්තමේන්තුගත මුදල රු. මිලියන 1,698.55 කි. පාලම දෙපස මීටර් 1.5 බැගින් වූ පදික වේදිකා දෙකක් ඉදිකෙරෙන අතර අංගම්පිටියේ සිට පාලම දෙසට මීටර් 60ක් දිග ප්‍රවේශ මාර්ගයක් සහ පාලමේ සිට පාසල් මංතීරුවට මීටර් 40ක් දිග ප්‍රවේශ මාර්ගයක් ද ඉදි කෙරේ. නව පාලම ප්‍රදේශයේ වගුරු බිම්වලට හානි නොවන පරිදි කණු මත ඉදිකිරීමට සැලසුම් කර තිබේ. මෙම නව පාලම ඉදිකිරීමත් සමග පාර්ලිමේන්තු පාරේ සහ කෝට්ටේ දෙසින් පැමිණෙන වාහනවලට නාවල ප්‍රදේශයට පහසුවෙන් ප්‍රවේශ විය හැකි අතර රාජගිරිය මාර්ගයේ පවතින රථවාහන තදබදයට සහනයක් ලැබෙන බව එම මහාමාර්ග අමාත්‍යාංශය නිවේදනයක් නිකුත් කරමින් වැඩිදුරටත් සඳහන් කළේ ය.