ත්‍රිකුණාමලය තෙල් ටැංකි සංවර්ධනයට සමගාමීව මෙරට ආර්ථිකය නංවන්න ඉන්දියාවේ සහය..

COLOMBO (News 1st) : ශ්‍රී ලංකාවේ ආර්ථික අර්බුදය සමනය කිරීමට ඉන්දියාවේ සහය ලබා දීම සහ ත්‍රීකුණාමලය තෙල් ටැංකි ව්‍යාපෘතිය සමගාමීව ක්‍රියාවට නැංවෙන්නක් බව එරට රජයේ නිල ආරංචිමාර්ග උපුටා දක්වමින් ඉන්දීය මාධ්‍ය අද(30) වාර්තා කළේ ය.

ඉන්දීය මාධ්‍ය වාර්තා කරන්නේ, ත්‍රිකුණාමලය තෙල් ටැංකි සංවර්ධනය කිරීමේ ඒකාබද්ධ ව්‍යාපෘතියට අදාළ සැලසුම් ද අවසන් අදියරේ පවතින බවය. ඊට සමගාමීව ඉන්දියාව විසින් ශ්‍රී ලංකාව දැනට මුහුණදී සිටින ආර්ථික අවපාතය සමනය කර ගැනීම සඳහා මූල්‍ය සහය ලබාදීමට නියමිත බව ද ඉන්දීය මාධ්‍ය වාර්තාවල සඳහන් ය. එළැඹෙන මාස කිහිපය තුළ ත්‍රිකුණාමල තෙල් ටැංකි සංවර්ධන ව්‍යාපෘතියේ වැදගත් අදියරයන් ක්‍රියාවට නැංවෙනු ඇති. ඉන්දියාව විසින් ශ්‍රී ලංකාවට ලබාදීමට නියමිත ණය පහසුකම් පැකේජය යටතේ ආහාර ද්‍රව්‍ය ඉන්දියාවෙන් මිලදී ගැනීමේ සැලසුමක් මෙන්ම තෙල් ආනයනය සදහා වෙනම ණය පහසුකම් වැඩටහනක්ද, ක්‍රියාමත්මක කෙරන බව ඉන්දීය මාධ්‍ය වාර්තා කර තිබේ.