ප්‍රියන්ත කුමාර මහතාගේ දේහයේ කොටස් නිවසට රැගෙන එයි

COLOMBO (NEWS1ST):  පකිස්ථානයේ සියල්කොට්හි කර්මාන්ත ශාලාවක සේවය කරමින් සිටියදී ඝාතනයට ලක්වූ ප්‍රියන්ත කුමාර මහතාගේ දේහයේ අවශේෂ කොටස් අද (07) අලුයම ගනේමුල්ලේ පිහිටි නිවසට රැගෙන ආවේ ය.

ප්‍රියන්ත කුමාර මහතාගේ සිරුරු කොටස් ඊයේ පස්වරු 5.00 ට පමණ දිවයිනට රැගෙන අවේ ශ්‍රීලංකන් ගුවන් සේවයට අයත් යානයකිනි. දිවයිනට රැගෙන ආ සිරුරු කොටස් පසුව පශ්චාත් මරණ පරික්ෂණය සඳහා මීගමුව මහ රෝහල වෙත රැගෙන ගියේ ය. පකිස්ථානයේ සියල්කොට්හී වසිරාබාද් මාර්ගයේදී ප්‍රියන්ත කුමාර මහතා ඝාතනයට ලක්වූයේ, පසුගිය සිකුරාදායි. පේරාදෙණිය විශ්වවිද්‍යාලයෙන් ඉංජිනේරු විද්‍යාවේදී උපාධිය ලද 48 හැවිරිදි දෙදරු පියෙකු වූ ප්‍රියන්ත කුමාර මහතා  පකිස්ථානයට ගොස් තිබුණේ, මීට වසර 11 කට පෙරදී ය. ප්‍රියන්ත කුමාර මහතාගේ සිරුර කොටස් හෙට (08) ගනේමුල්ල පොල්හේන පොදු සුසාන භූමියේ  තැන්පත් කරන බව පවුලේ ඥාතීහු පැවසූහ.