කොරෝනා ආසාදිතයින් 697 ක්... මරණ 23 ක්

COLOMBO (NEWS1ST): අද (14) දිනයේ නව කොරෝනා ආසාදිතයින් 697 දෙනෙකු හඳුනා ගෙන ඇතැයි, රජයේ ප්‍රවෘත්ති දෙපාර්තමේන්තුව පවසයි.

මේ අතර සෞඛ්‍ය සේවා අධ්‍යක්ෂ ජනරාල්වරයා විසින් තවත් කොරෝනා මරණ 23 ක් අද (14) වාර්තා කරනු ලැබීමත් සමග සමස්ත මරණ සංඛ්‍යාව ද 13,995 ක් දක්වා ඉහළ ගියේ ය. රජයේ ප්‍රවෘත්ති දෙපාර්තමේන්තුව නිකුත් කළ නිවේදනයට අනුව, මියගිය පිරිස අතරින් 13 දෙනෙකු කාන්තාවන වන අතර ඉතිරි 10 දෙනා පිරිමි ආසාදිතයින් ය. වයස අවුරුදු 30 – 59 ත් අතර වයසේ පසුවන ආසාදිතයින් 6 දෙනෙකු සිටින අතර ඉතිරි ආසාදිතයින් 17 දෙනා ම වයස අවුරුදු 60 සහ එම වයස් සීමාව ඉක්ම වූ වැඩිහිටියන් ය. අද (14) වාර්තා කරන ලද මෙම මරණ 23 සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කරනු ලැබ ඇත්තේ, ඊයේ දිනයි.