කාබනික පොහොර හදන්න ගෙනා කසල තේ නිසා උණුසුම් වූ එප්පාවල

COLOMBO (NEWS1ST) :  කාබනික පොහොර නිෂ්පාදනයේදී කලවම් කිරීමට ගෙන ආ බවට කියන කසල තේ තොගවල ඇසුරුම් එප්පාවල, ඇඳගල ප්‍රදේශයේදී ගිනි තැබීම හේතුවෙන් ප්‍රදේශවාසීන් හා එම ස්ථානයේට පැමිණ සිටි පිරිස අතර ඊයේ (13) මධ්‍යම රාත්‍රියේ උණුසුම් තත්ත්වයක් හටගෙන තිබේ.

රේගු අත්අඩංගුවට පත්වීමෙන් පසු විනාශ කිරීමට නියමිතව තිබූ මෙම කසල තේ තොග එප්පාවල රජයේ වී ගබඩාව වෙත රැගෙන විත් තිබුණේ, කාබනික පොහොරවලට කලවම් කිරීම සඳහායි. අදාළ කසල තේ තොගය කන්ටේනර් දෙකකින් එම ප්‍රදේශයට ගෙන ගෙනවිත් තිබූ අතර අදාළ නිලධාරීන් ඒවා අසුරා තිබූ කාඩ්බෝඩ් ඇසුරුම් හා පොලිතීන් කවර එම පරිශ්‍රයේ ම ස්ථාන දෙකකදී ගිනි තැබීමට පියවර ගෙන තිබිණ. එම ගිනිතැබීම් සමග තම නිවෙස්වලට දුමාරය පැමිණෙන බව පවසමින් ප්‍රදේශවාසීන් එම ස්ථානයට පැමිණ ඊට විරෝධය දක්වා දක්වා ඇති අතර පසුව එප්පාවල පොලීසියේ නිලධාරීන් ද එම ස්ථානයට පැමිණ තිබුණේ, ප්‍රදේශවාසීන්ගේ දැනුවත් කිරීම මතයි. මෙම ස්ථානයේ කසල තේ ගබඩා කිරීමට අවසරයක් දී තිබේදැයි, මෙහිදී පොලිස් නිලධාරීන් එහි සිටි නිලධාරීන්ගෙන් විමසා ඇති අතර එවැනි අවසර පත්‍රයක් ඉදිරිපත් කිරීමට ඔවුන් සමත්ව නොමැත. කෙසේවෙතත් කාබනික පොහොර නිෂ්පාදනය සඳහා මෙම කසල තේ තොගය රැගෙන ආ බවට අදාළ නිලධාරීන් පොලීසිය හමුවේ පවසා තිබේ. කෙසේ වෙතත් එම ස්ථානයට පැමිණි ප්‍රදේශවාසීන් ගිනි තැබීමට සිය විරෝධය පළ කිරීමත් සමග එහි උණුසුම් තත්ත්වයක් උද්ගත ව ඇති අතර එය සමථයකට පත් කර ඇත්තේ, පොලීසියේ මැදිහත්වීමෙනි.